農夫今晚繼續喺旺角麥花臣場館舉行演唱會，染咗一頭白髮嘅黃子華去咗捧場，開騷前有個迎賓儀式，兩位主角會邀請睇騷嘉賓上台影合照同傾兩句，子華神當然係被邀上台嗰位嘉賓啦！而佢上台時，全場觀眾齊聲歡呼。子華就拉埋好友羅金榮（Wing）上台，或者有啲人會對羅金榮感到陌生，唔知大家有冇印象樂壇曾經有隊叫「幕後玩家」嘅樂隊，羅金榮就係主音喇！

兩位嘉賓一上台，C君就問：「子華神，你係咪打算今晚復出呀？」子華冇答C君問題，一味幫老友賣廣告，反而係問羅金榮：「你係咪出新歌呀？有咩宣傳就好做喇！冇免費飛你睇，我哋要講半個鐘頭先。」C君接住話：「係就好，我哋好做好多。」陸永就笑話：「我哋可以休息吓先。」子華即刻大耍太極：「但我今日件衫唔係好襯，哎！都係畀番啲時間你哋，我覺得唔係好夾囉！」正當子華同羅金榮想落台之際，C君即刻嗌住佢哋：「子華神，可唔可以影張相？」

子華即冷笑話：「真係冇免費騷睇，每次都要做番啲嘢，仲要係旺角最蠱惑嗰兩個喺度。」跟住子華對觀眾講：「不如大家一齊上台影啦！台上得我哋幾個咁冷清。」之後子華就落台睇騷喇。

子華神今晚現身農夫演唱會

子華仲帶埋朋友「幕後玩家」主音羅金榮上台，仲幫對方喪宣傳。

C君要求影合照，子華冷笑話農夫：「旺角最蠱惑嗰兩個喺度。」

子華笑言冇免費騷睇