《萬千星輝頒獎典禮2013》昨晚於電視城舉行祝捷晚宴，視帝黃子華、視后田蕊妮、張智霖（Chilam）及岑麗香等亦有出席。一身Johnny Depp打扮的子華，被問到會否再為無綫拍劇？他笑說：「呢兩年冇時間，知發哥話返嚟拍，我梗係想拍。（同發哥合作？）好難，係冇可能，如果佢肯我肯，發哥做縣官，我就做當年發哥做嘅衙差。（咁想唔想同Chilam合作？）Chilam做飛機師，我做空少，係『凶』兆個『凶』。」而姍姍來遲的Chilam，甫到場即與子華合照，期間又咬耳仔密斟，子華更摸Chilam腹肌，對於子華欲與他合作，Chilam笑說：「呢樣嘢10年前已同高層提議過。（梁乃鵬台上話你冇唔開心？）係美麗誤會，我已得到好多，呢個獎好有分量。（幫TVB再拍？）都期待，等安排，首先要拍《衝上雲霄》電影版。（建議電影版加子華做？）你估我係監製咩？」

至於「視后」田蕊妮透露新年期間與老公杜汶澤到緬甸旅遊，昨日才正式復工，問到旅費是否由阿澤負責？阿田哈哈大笑說：「兩公婆邊有計，佢嘅錢即係我嘅錢，我嘅錢即係我嘅錢。」談到與視帝黃子華及張智霖同場，會否希望日後有合作計劃？阿田說：「要我揀一個好難，兩個都要得唔得？（加埋阿澤？）佢都唔要我，佢呢排會揀陳靜多。」

Chilam甫到場即與子華合照，期間不時咬耳仔密斟。