提醒番，黃子華個騷喺噚晚11點完咗頭場，下面係佢個棟篤笑入面講到同性合法化。

「咁講唔講好呢？梗係講啦話之你，好啦各位，我認為呀吓香港呢1、20年，好多嘢係停滯咗落嚟，最重要當然係政制啦，但我認為就算政制停滯咗，好多第二啲嘢唔應該停滯，我只係講3樣，第一樣：畀個音樂壯下膽先！（播出《男兒當自強》音樂）香港喺係1990年同性戀非刑事化，轉眼間到今日，非咗就喺差唔多30年喇，都仲未合法化，非刑事化即係話你唔係犯法，但你都唔係合法㗎同志。」

「我覺得有啲似咩呢？即係你個仔就帶個女仔返嚟屋企瞓，然後你就同佢講：『你係喺度瞓㗎咋，你唔係喺度住㗎，你係非住客化㗎，嗱，你係冇鎖匙，所以如果10點鐘之前你返唔到嚟呢，你就唔好返喇，你試吓嗰鐘，個鐘會漏電㗎！我再講多次，你喺度瞓咋，你唔係喺度住！』咁個問題係，依家佢喺度瞓咗30年，如果有隻蚊喺你屋企瞓咗30年，佢又有交租，咁你開飯係咪都要預吓佢呀？『今日阿蚊蚊生日呀，嚟！食靚啲，針呢度！』

「同性戀喺香港非刑事化30年，有交租、有交稅、有貢獻，做咗啲咩壞事呢？我覺得係有嘅，令到啲時裝炒高晒，如果唔係因為佢哋，你依家買LV可能有愛馬仕送㗎！點解仲係唔可以合法化呀各位？阿林鄭呢就同我哋講，佢話因為社會上係冇共識，主要呢有好多宗教團體係唔同意嘅，喂宗教團體係咪基本上係唔會同意第二個宗教團體嘅呢？（全場勁拍掌）我個神先係神㗎嘛，（突然用國語講）『你的是假的！』，我唔知點解變咗做普通話（笑）。」

「即唔係喺香港、唔係喺21世紀，對一個宗教嚟講，最應該反對嘅嘢係咪就係對方嘅宗教？但你從來冇聽過香港有任何一個宗教打畀呀林鄭或特首：『阿特首唔得呀，佢個教對我個教係最大嘅煽動，我唔理呀，佢尖沙咀果幢嘢一定要拆咗佢，我唔知呀你做清真牛肉館啦！』唔會㗎喎，點解？因為香港係有宗教自由，係咪？當然係啦，但宗教自由有乜嚟支持？神嚟支持，即係淨係你哋識得做禮拜？我個神識得做世界呀！唔啱聽呀，睇吓邊個祈禱大聲啲。」

「嗱，一班人受歧視咁點解決？就係問吓最歧視佢哋果班人嘅諗法，咁所以你而家應唔應該買樓呀？梗係問四大地產商。我有時諗吓即係同志呢樣嘢幾時可以合法化呢？好簡單，四大家族出櫃，阿誠哥親自出嚟同大家講：『（誠哥腔）冇錯，我係同志BB，你睇，我眼鏡咁樣係睇唔出嘅，係呀唔容易㗎，阿彤哥成日勸我果陣時我唔夠勇氣、阿兆基又話幾個細路都好支持，所以呢我今日出櫃…桶，希望各界支持特別係宗教界，第二啲我唔曉嘅，但呢樣我好清楚，同志，冇乜咁出奇、買樓都要畀首期！』」