子華話，知道有位仁兄，喺97聽到「回歸」呢個字，就好感動：「見到支國旗升起，感動到即刻起立敬禮，然後『哭』（普通話講），佢勁cool，唔知點解佢會敬禮，除非係軍人，唔知點解會敬禮。

「點解佢會咁做？佢解釋：『因為，我見到國旗升起，我終於有個國家！』呢個講法我覺得好有問題。我哋唔係亡國，我哋係復國喎！個國家不嬲喺度，仲好歡迎你返上去！

「大家都知，以前喺上面，落嚟係好困難，游水落嚟，攬住個籃球，你好功夫就可以攬住保齡球，但係喺我哋下面，上去係好容易㗎嘛！

「有冇聽過一個說話，係『行路上廣州』？即係話你戇居，有車搭㗎傻佬！點解要行路，嗰程火車幾毫子。『呀！幾毫子咁貴！咁我唔返去搵祖國，咁回歸祖國嚟搵我啦。幾毫子喎，食死人呀。』哭（普通話講）。」

「呢個係講笑，點解佢真係哭（普通話講）？因為物歸原主，香港係屬於中國嘅，英國終於畀返香港中國喇，係咪？」子華一講完，有觀眾即拍掌嗌「Yeah！」。

子華話：「話yeah呢啲人，你知唔知你咁樣真係好睇小中國？喂，唔係英國俾番香港中國呀，係中國一路唔收住咋！

「80年代戴卓爾已經走去搵鄧小平談判，『喂，阿鄧Sir，97可唔可以唔收番香港住呀？』鄧小平話，冇問題、冇問題呀，我哋依家即刻過嚟收吖！你識做，就唔收住。』80年代已經唔係第一次唔收住，幾時係第一次，係囉，一定係49年，中共將成個中國都打晒，收唔返香港？你嗰條叫深圳河呀！唔係叫多瑙河呀！唔係好遠㗎咋！

「事實上當時人民解放軍第四野戰軍第五中隊已經就喺深圳河邊，佢哋根本就唔需要打過嚟，淨係每日對住英國佬嗌口號，你英國佬都腳軟啦！係咪先？佢哋口號有五個字，頭兩個字係『服要』，好清楚嘅，但第三個字係『塞』外個『塞』，定係城『寨』個『寨』，係個『塞』字，睇錯，第四個字係『買』定『賣』？」