黃子華曾經同大家完美演繹乜嘢叫「喬裝」，點樣先至係「化妝」。今晚，子華再透過「面斥不雅」四字，再講「喬裝」。

「你去到靈堂，你都會見到，『靈堂範圍，面斥不雅』，咩意思呢？你係可以鞠躬，但你真係唔好太喬裝，唔係你陣間瞻仰遺容時候，你個妝仲厚過佢，咁，依家都唔知邊個死咗，係唔係？」

「講嚟講去，面斥不雅咩意思，無非好簡單，你知㗎，大家心裡面都有把尺嘅，你知道應該係點樣做㗎，唔使講到明，係咪？成個香港好似大嘅武館咁，上面寫住『切磋武藝，面斥不雅』，即係咩意思？即係講手，唔好拆祠堂，點解呀？因為你唔係拆卸公司，你係『一代宗師』，係唔係？唔係『一代乞兒』，面斥就不雅。」

「各位，喺香港嘅黃金年代，我哋去到一個境界係可以面斥不雅，全香港大街小巷，因為我哋大家練咗香港呢套內功：Jetso得嚟賑災，王晶得嚟家衛。佢既返幫會，同時亦都返教會，大家唔係聖人，但都唔係人……渣，『全球獨家 面斥不雅』。」