「每個人走出嚟時好似喺毒氣室走出嚟，雙眼發紅，充滿仇恨，點解呢？因為冇人睇得明。」黃子華講緊嘅，係某位大導演嘅作品。

「係呀，大家嗰幾年入去戲院嘅感覺睇一次就好似係…好似睇住班友自由行咁，喂，睇住幾個大明星自由行，咁佢哋又唔係好似好知自己行去邊咁，得閒咪講吓嘢囉，我都冇見過咁口黑臉黑嘅女主角，然後好喇你係咁忍咗個幾兩個鐘，終於部旅遊車到喇，部車要開喇！套戲要開喇！又要等個嚮導。咁邊個做嚮導呀？嚮導終於出現喇喎，邊個做嚮導呀？二郎神！因為佢之前套戲冇出現過，係同套戲完全無關，佢好似係《封神榜》走過嚟咁，然後二郎神出現做咩呢？一上車、梳頭！梳完頭，落車，成套戲，完！」

「有齊大卡士大製作，出色嘅對白『冇雀嘅腳仔』，但係你就係唔知佢講乜鬼嘢。佢就好似生命嘅意義一樣，『你唔知佢係咩，你淨係知佢唔係咩』。佢唔係喜劇嚟嘅，又唔係動作片，都唔係愛情片，邊有愛情片個女主角由頭到尾咁口黑臉黑？」

「喂！你有二郎神出嚟梳頭呢套戲乜都唔係㗎啦！都冇睇過一套咁嘅戲嘅！係囉，佢就係一套你從來冇睇過嘅戲，一套全新嘅電影。」

「以前嘅阿飛，會令你諗起麥基；呢套阿飛，會令你諗起『阿柏奇直升機』，唔係嗰個，佢係會好似同你講，『你想喺你嘅人生裡面飛呀？你可能會整死人哋、整死埋自己！』嘩好似有啲嘢咁喎。」

「佢仲好似講緊，呢個『阿飛』就係香港，由細到大就係冇阿媽㗎，係第二個阿媽養㗎咋，佢去尋阿媽呀！嘩，咁好多嘢喎，梗係好多嘢啦，拍咗成4,000萬，喺香港只係收得900萬。」

「喺嗰個年代，如果你有任何其中一個卡士，你都收幾千萬啦！畀晒你加埋係收咗900萬，所以當時我認識好多香港嘅電影人係好唔鍾意王家衛，我喺度諗，因為咩呢？因為佢蝕大本？唔係吖，小弟都拍咗套叫《一蚊雞保鑣》，好似收咗（子華自己都忍唔住笑）5位數字呀，你哋『撐』眼呀呢啲呢，夠畀㗎喇，就你哋幾位睇咗啦可能係（指前排觀眾）但蝕大本都冇人憎我喎，起碼我唔知喺電影圈有人憎我，係我憎自己嘅啫。」

「咁我同王家衛最大分別係咩呢？好大分別呀大佬。我係收咗人哋嘅資本，我係想回本㗎，我回唔到啫！咁呢個係觀眾嘅水平問題啦。但王家衛唔同喎，王家衛好似…好似佢唔係好想回本咁喎！喂你拍自由行就預咗冒險㗎啦，你仲搵個二郎神做嚮導呀？你用咗人嘅資本，而你唔諗住回本，哦，呢個就係我哋香港資本主義嘅反骨仔！係jetso嘅無間道！」

「我識得有個朋友，叫做王晶，王晶係我前輩。晶哥，我諗佢唔係好鍾意王家衛，因為拍咗部戲，係搵我扮王家衛。」全場拍掌。「特登搵我嚟刺激佢㗎啦擺到明。我係扮過麥當勞叔叔，我扮嗰期麥當勞啲薯條（銷量）都下跌。」

「咁呢，我喺王晶套戲裡面扮王家衛，咁我個名叫乜嘢呢？係叫做『王晶衛』。啲人就話，咁即係王晶，想笑王家衛。」

「我相信晶哥係睇得好通，大家諗下，王晶衛喎，王晶衛英文係乜？Wong Ching Wai。中國近代史又有一個Wang Jing Wei，汪精衛。中國第一漢奸，出賣中國。我哋呢個『王晶衛』出賣資本主義，要資本主義為電影服務，本末倒置喎，出賣jetso喎！喂，嗰個Wang Jing Wei成為千古罪人，但我哋香港呢個Wong Ching Wai，係一代宗師。」

「各位，90年代嘅香港，我哋係已經進化到有人會公然挑戰jetso嘅精神，jetso，有時唔係咁著數，有時要放棄表面嘅著數，先至係最jetso。」