黃子華在棟篤笑一開場先講完黃藍絲之分令好多香港藝人冇得撈，社會分裂，他續道：「睇佢前面憎佢後面，唔係，係睇佢後面憎佢前面，我點知佢咩樣啫，佢睇籮友就知佢小器，兩股嘢夾實晒。喂，依家香港唔使睇喇，係聽到佢把聲，憎埋自己個friend。以前係一竹篙打一船人，依家係一竹篙打最後一隻救生艇。

「『你隔籬沉咗喇，唔好理啦。』『咦，嗰度有隻救生艇喎，咦，個個咪黃子華！』之後扮普通話講：『你還看甚麼，叫我呀，叫救命呀！』又得佢，收工，有冇咁過份呀？

「你知唔知依家香港，係會恭祝人哋屋企死人，撞正生日仲有歌聽。」之後子華唱「恭喜你今日個仔摺埋，晚上再恐死埋老竇，年年都有今日，你晚晚都要裝香，恭喜你。」

「人哋屋企死人，你恭喜佢，你有冇人性呀？社會上群起辯論，竟然係有得辯論，因為宜家辯論嘅邏輯變咗係，『希特拉死老母應否恭喜佢？』『希特拉ｘ家鏟應否成為公眾假期呢？』咁邊個係希特拉呢？咁就睇吓你鍾意嘢顏色，暗角7警、暗角打鑊，冇可能係啱呱？」

全場一片靜默。

「呢度完全冇人敢表態？（之後先拍手）你睇吓香港幾恐佈，呢啲不嬲日日報紙，個個發晒癲，但係入到場冇人敢表態？你哋醒目，因為我影低你哋。暗角7警、暗角打鑊認為啱嘅，拍吓手？」有少少掌聲。子華再問：「認為唔啱嘅？」全場即有不少人拍手兼尖叫。

子華續道：「認為啱嗰啲，官都判埋喎，點解有得坳呢？歷代嘅忠良，係俾啲狗官迫害，打人就唔啱，岳飛咪唔啱，打人所以咪死囉，但係岳飛死之前，都有幾塊金牌喎！依家真係難分真與假，呢個社會真係、吓，我喺街見到一幅對聯，你點演繹呢？佢寫住：『暗角7警執死雞、善用私刑龍咁威！』」