據知子華神今年7月初到月中，喺紅館搞楝篤笑，有指預計開15至18場，今次係佢自1990年《娛樂圈血肉史》後，搞棟篤笑28年來，第四度攻佔紅館，貴為「棟篤男神」，基本上唔需要宣傳之下，門票亦火速售罄，對上一次棟篤笑喺2014年嘅《唔黐線唔正常》撞正雨傘革命，身為港人，子華感慨萬分。

完騷後，子華宣告封咪暫別棟篤笑，有感現時香港好陌生，對香港前景太悲，「我諗好多嘢已經笑唔出，唔知點笑，大勢係悲觀」。可能大家會覺得誇張，不過子華嘅棟篤笑，奇妙之處係當理解到事情嘅悲哀，根本唔會笑得出。

過去嘅棟篤笑，子華陪港人經歷過97年回歸、金融風暴、03年沙士及佔中等香港大事，鑊鑊新鮮鑊鑊甘，啲金句回顧一下：

回歸代表咩
「全港市民熱烈慶祝回歸10個字，有8個字係呃人，只剩『回歸』兩個字係真。唔好睇少回歸呢兩隻字，香港一定會好，因為大家記唔記得回歸唔係叫回歸，係收番，唔記得幾時收番，變咗回歸，收番嘅意思係好被動、夾硬嚟，人哋都唔想，回歸感覺係好主動，熱切期望，忽然好愛國。」── 1997《秋前算賬》

港人怨氣大
「一個人最痛苦係咩呢？你知道自己有好多問題，但你又唔知道係咩問題。你真係好知道，你又講得出，你都解決唔到嗰種好無助、唔知點樣解決嘅情緒，如果喺呢種情況之下，你能夠講一句：最衰都係董建華！咁你又過得一日。我再強調，呢個係一個百年難得一遇嘅機遇，香港從來未試過有咁大嘅怨氣，但係香港亦都從來未出過一個人係咁適合做出氣袋嘅。」── 2003《無炭用》

人類食物鏈
「人類有人類自己嘅食物鏈，人類嘅食物鏈簡單好多，只係得3種。最下層係無產，中層係中產，頂層係冚ｘ產。係絕無不敬嘅成分，因爲頂層嘅人唔係房產，權產就係遺產，名符其實冚家都係產，所以我哋好多時叫冚家產會加啲乜嘢？冚家富貴。」── 2006《兒童不宜》

佔中「扯B論」
「我哋係因為愛而開始呢個運動。無論係政府，或者市民，我哋都係因為有啲愛。我希望大家以後更加要諗吓，呢個愛，除咗單扯之外，因為如果一邊扯得好實，另一邊唔會話：『你唔放，我亦都好愛佢！』，我又扯得好實，於是就扯瓜佢。所以，要諗吓，跟住點扯呢？嗰個愛，先係真正嘅考驗，希望大家有智慧。」── 2014《唔黐線唔正常》