「香港嘅黑社會仲有全世界最強勁嘅公關，亞洲荷里活、香港嘅電影圈，我哋唔單止10套戲有9套係講黑社會嘅，我哋10個電影老闆有5個就係幫會（全場拍爛手掌），你睇香港人幾引以為傲，係咪呀，威囉，我唔叫佢做黑社會我叫佢做幫會，因為好多都幫咗我嘅。

「喂！其實10個裏面唔係得5個咁少㗎各位，其實10個裏面有成8個㗎，點解話得5個？因為有3個…死咗，仲係畀人打死咗，你有冇諗過你聽日唔使返工，唔係因為打風，係因為你老闆畀人打死咗，好彩冇人拍手，仲係畀對家個老闆打死咗喎，即係依家係講緊『麥當勞休息一天，因為肯德雞做咗嘢！』

「香港最危險，我認為最勇武嘅職業係乜，就係影評人，你做馬評人呀、股評人呀，就算你累死人，你好少會聽到佢哋俾人打㗎喎，點解呀？因為你落咗注，無論係股票又好，隊個冧目，一嘢就落咗去㗎喎。

但係你拍戲唔同喎，你拍戲係一個漫長嘅過程呀，我要日日用把槍指住呢個小器華，指到手指都抽筋，然後指指下我個細佬又俾啃德雞啃死咗，我要當睇唔到，然後我晚晚臨瞓前，舐下個雞籮柚，卧身嚐籮，然後我千辛萬苦，腥風血雨，拍完我呢部傑作，母女風雲食鴨棍，無錯你無聽錯，唔係食夾棍，係食鴨棍，剩係呢個名都收八千萬啦，依家就俾你條四眼仔影評人，一嚟就兩句說話：『小心入場…睇完會內傷…』」