黃子華噚晚力壓大熱張智霖及吳鎮宇，首次封視帝，不過子華身在上海，未能親自領獎，只能夠由鄭裕玲（嘟姐）打電話畀佢恭喜佢拎視帝，而子華喺電話內繼續發揮幽默本色，話嘟姐已有兩年冇打電話畀佢，又問「最佳男主角」係咪即係「視帝」？

事有湊巧，嘟姐13年前憑《男親女愛》封視后，不過當年佢唔喺現場拎獎，成為第一位冇喺現攞獎嘅女主角，而當日頒獎畀佢嘅，就係黃子華；至昨晚，子華首奪視帝，佢亦係首位唔喺現場領獎嘅視帝。

而子華膺視帝後，外界議論紛紛，唔少網民認為子華演技雖然備受肯定，但就認為吳鎮宇演得更佳，更應該攞獎；有網民亦言劇集未播完就可以拎視帝，情況實屬罕見；另外，亦有內地網民坦言dislike子華攞獎，又問佢係邊個嚟？失落視帝的鎮宇，今日凌晨喺微博若有所指話：「要還的已還了，謝謝所有投票者，我在電視出現了。」

至於身處上海嘅子華，就喺facebook自拍咗張相，留言話：「你哋嘅支持，我全部收到晒！謝謝你們！」﹑「Thank you guys, for always stand my me. Now let’s celebrate!!!」

而王祖藍喺微博：「今晚的頒獎典禮賽果實在峰迴路轉，但感到高興的，是公司用了全民投票方式，不來的也得獎，真的進步了。無奈仍有人不滿意，只想勸這些觀眾，投票吧！記得做福祿壽時搞了一個鄉姐選舉，我也支持另一位佳麗睡公主，可惜我的票很多，支持睡公主的只是精神上支持但沒投票，我又被人說造馬了！ 但我那會故意造馬搶一個搞笑選美獎？被人說造馬時多無奈！觀眾呀，下次心裡支持誰就付諸行動吧！否則獎項不是你支持的人得到時，說人家造馬會很無辜喔！」

另外，曾獲視后嘅鄧萃雯，都有留意賽果，今日佢喺微博留言，講得可圈可點：「一直認為，『演出、評審和投票』應是已經完成的任務，跟候選者當晚出席與否，不應該構成能否獲獎的直接關係，除非是那種毫無認可性的 『比面派對頒獎禮』。所以昨晚算有點突破，視帝頒給個沒來的；不論理由目的為何，也算有點驚喜，起碼是形式上的一種進步。恭喜黃子華！你贏得最型。」

身處上海的黃子華（左圖），多謝大家支持；至於鄧萃雯喺微博留言恭喜黃子華，仲話佢贏得最型！

子華facebook

有心水清網民話嘟姐當年攞視后，唔係頒獎禮現場；同樣子華封視帝，亦不在現場。