農夫勞師動眾 子華、嘟姐十年復合

2017年11月11日 | 蘋果日報

農夫一連六場演唱會前晚喺麥花臣場館開鑼,佢哋請咗十年冇合作嘅黃子華同嘟姐鄭裕玲拍片支持,子華大讚農夫:「我聽盡世界上咁多嘅rap都係偏向壞孩子,只係香港嘅農夫好似剛剛大兩歲,但係又好似明白晒人生真正嘅道理,好聽嘅就係救世,有普世嘅心腸,唔好聽就係離經叛道。」

初次見好核突
嘟姐就話:「第一次見覺得佢哋好核突,原來歌手嚟㗎!點解?家淪落到呢個地步,夾落好nice,識咁耐冇畀過一隻碟我,有一次逼我去睇佢哋嘅演唱會,覺得佢哋幾有文采,歌詞幾有message。」
之後子華話自己同嘟姐拍呢條片都係中伏,子華話:「相信佢哋識我哋嘅時候已經有鋪排呢件事,C君拍戲嗰時問我可唔可以做嘉賓,我一口拒絕,佢就話拍片,我諗住起身刷牙就可以拍,點知話準備咗個有production嘅地方,你話我哋幾耐冇咁樣出嚟?咪就係十年前拍廣告,嗰次收幾多錢?」

嘟姐幫手拉攏
農夫完騷後受訪,話今次嘟姐有份幫手拉攏子華:「都係嘟姐line up,都幾勞師動眾,不過其實係嘟姐提議㗎!」講到C君唱《好彩分手》時收到一個訊息,問佢係咪當年同林珊珊個女李澄分手嗰時嘅事,C君話:「唔係,好耐喇,分咗手咁耐唔記得喇!收到都既驚且喜,唔知點回應。」陸永即刻幫手解圍:「你哋唔識㗎嗰個,係出面嗰啲爛桃花嚟㗎!」

11ec4p2a

男神黃子華同嘟姐合體拍片支持農夫。