合共35場，由黃子華、陳法拉首次合作演出之舞台劇《前度》，今晚假座香港演藝學院開鑼。楊怡、羅仲謙夫婦、陳爽夫婦、宋熙年、高海寧、胡定欣、豹哥豹嫂同雷頌德老婆Jade等都有到場，唔少仲係法拉派飛請好友嚟睇添；另張敬軒、劉德華、鍾楚紅、鍾珍、陳慧琳、馬浚偉、蘇永康、蕭定一同阮兆祥等都有送花籃。

觀眾於8時入場，陳爽入場受訪謂今次捧場係兩個都支持，但佢同法拉多啲交情，而且好耐冇見法拉喺大銀幕現身：「每次知佢由紐約返嚟都會約食飯，但佢今次閉關，應該係忙於綵排喇。」陳爽又話睇一場，因為朋友都撲唔到飛云云。

至於高海寧同宋熙年就一齊嚟，宋熙年話都係睇一場：「我一知道開場，第一時間問法拉拎飛，點都要去睇㗎喇！」高Ling都話好多朋友第一round都買唔到飛，要加場先買到，兩人亦謂法拉係閉緊關：「法拉做好嘢好認真，睇新聞見佢日日都排練，無特別煩佢，等佢完左之後再約食飯。」

楊怡就話謙謙係忙裡偷閒：「今日放假出來學嘢，法拉請睇，自然要嚟。」謙謙最近同羅嘉良合作，學到好多嘢，「今日係嚟偷師同見見好朋友，最重要係拍拖。」楊怡就話：「好耐冇見法拉，好掛住佢。」

講到陳敏之有B，楊怡話好戥對方開心，睇住佢結婚陀B，對方都成日催佢快啲生B，「不過呢啲嘢隨緣啦！」問楊怡點解噚晚唔去樂易玲生日P？楊怡話：「我有send message俾佢同佢講生日快樂，謙謙就要開工。」咁幾時補番食飯？楊怡話：「最快都要等到嚟飲我哋年底嗰餐喎！」