噚日情人節，唔少一對對戀人拍住拖入場睇戲，已經成為指定動作，今年仲要加埋係年廿九，所以噚日好多賀歲片都搶閘上映試水溫，等啲戲院商可以睇下點調動啲場次。

三套華語賀歲片郭富城主演嘅《西遊記女兒國》、黃子華自編自演嘅《棟篤特工》同葉念琛導演《我的情敵女婿》噚日都有優先場。

自嘲自己係「票房毒藥」嘅子華神一洗頹風，《棟篤》噚日票房已經收成256萬，成為華語片冠軍之外，仲係單日票房第二位，如果計埋澳門票房，就過270萬。講番子華神過往主演加編劇嘅戲，往績都麻麻哋，好似佢套自導自編自演嘅《一蚊雞保鏢》當年票房就只有17.5萬元、《沙甸魚殺人事件》得97.9萬元、同梅艷芳合作主演嘅《男歌女唱》都係得127萬元、編劇同演出嘅《人生得意衰盡歡》仲只係收5.1萬元票房，所以話今次佢套新作可以話吐一口烏。要計子華最高票房嘅，應該係2000年佢同袁詠儀合作嘅《唔該借歪》，有398萬票房。計埋《棟篤》截至今日下晝5點嘅200萬票房，即係話子華用咗一日半，就破咗自己最高主演電影票房紀錄。