「達ming x 農夫《已經爆咗》棟篤唱2016」噚晚伊館尾場，嘉賓就係同張達明多年老友嘅張智霖（Chilam），嚟睇嘅仲有黃子華、蘇玉華、潘燦良，吳綺莉、鄭嘉穎同陳凱琳節等等。

Chilam做嘉賓梗係上台唱歌喇！達明即刻食住上話：「真係被人叫回水，Chilam可唔可以救我。」然後點Chilam落台握手，台上觀眾反應熱烈，農夫同達明就爛唱《祝君好》，佢哋搞笑話：「嘩！我哋四句已經可以粉碎一首歌。」

Chilam接受訪問時話：「幾個月前搵我一口答應，同達明係識咗好耐嘅朋友，好開心見佢好番哂，充滿活力，嚟助興一下。」被達明老點去握手，Chilam話：「事前知道，達明叫我代佢落台握手，無問題。」問到Chilam有冇興趣做棟篤笑，佢似乎好有興趣，不過….佢話：「我都覺得自己可以，講嘢OK，自己有啲幽默感，但係市場上大家覺得我係唱歌好啲多過講嘢囉！」

「達ming x 農夫《已經爆咗》棟篤唱2016」噚日係一日做兩場，達明喺後台做訪問嗰時都話體力透支，佢話：「攰，好辛苦，把聲都爛哂。」之後勁讚農夫又唱又跳，C君就話係新陳代謝問題。」

講到搞PART II，達明話唔好，仲推落農夫度，陸永就話今次係因為達明先搞得成。場入面農夫講到話做歌手賺唔到錢，但係有啲歌手，內地唱70場，500萬一場，一賺三億，問佢講邊個？C君即刻話：「你哋寫，我睇報紙，無求証過。」陸永搭嘴：「唔駛問知係真。」

之後達明自爆子華睇完話好好睇，仲話搵日出來食飯傾下計，農夫即刻超興奮，達明話：「唔係聽日同後日，有時間得閒約出來傾。」

問達明想唔想拍劇，佢話：「想，之前發微信畀班導演，KEY自己個樣落去張海報度，開下會，按下門鐘，行行企企，我都可以，其他就唔係好得。」

子華呀!!!