男神黃子華嘅舞台劇將於7.1開騷，連開廿四場，近期忙住綵排，前晚抽空出席友人嘅生日聚餐，《蘋果》記者喺中環歌賦街嘅意大利餐廳，同已故巨星張國榮嘅摯愛唐鶴德、張艾嘉等20多人，包場為友人慶生，又開咗多支酒慶祝，席間言談甚歡，子華邊講邊飲邊扯煙，原來佢嘅煙癮都好大，短短一粒鐘之內，竟然扯足5支煙，幾乎煙不離手、酒不離口，未知係唔係因為練舞台劇好大壓力！

今日有周刊爆，子華近日不時為《前度》排練，話晒陳法拉依家喺美國茱莉亞學院讀戲劇碩士二年級，演技應該好過之前，不過報道就爆綵排嗰陣，子華對演出要求好高，成日黑面扯火，同鬧爆法拉，二人休息時都係冇交流，各有各黑面，唔知係唔係子華太過緊張，令法拉都精神緊張埋一份，就算子華冇去綵排，佢都努力去排戲，大熱天時，為咗演個角色投入啲，佢都照著冬天衫拎住幾袋日用品，又原地跳，令自己有氣喘嘅聲，綵排都搞到成日身汗。

據報道指，今次子華咁緊張個舞台劇係因為《前度》係改編自英國劇作家David Hare嘅《Skylight》，由於呢個劇喺外國好受歡受，香港有唔少劇團都想演，所以子華做咗唔少資料搜集，先拎到原作者同意，批准改成廣東話版去演，認真夠晒機會難得。