【狂撳F5都冇用】子華神舞台劇極速售罄

2016年5月9日 | on.cc 東網

男神黃子華今年唔搞棟篤笑，轉為夥拍陳法拉演出舞台劇，之前預告片一出社交網站已經洗晒版，粉絲都話要撲飛，今日終於到咗信用卡優先發售嘅日子，今早10點開售，唔夠一個鐘，21場舞台劇優先門票極速售罄，仲要係單人位都冇剩！子華神號召力認真驚人！

而《東網》記者今早都有份加入戰團，準時埋位實測，曾致電訂票熱線逾200次，仍未能接通，而網頁則顯示系統繁忙，完全進入唔到訂票頁面，真係F5掣都就快爛！