嘩！男神呀！講緊嘅係即將同陳法拉做舞台劇《前度》嘅黃子華，雖然男神呢排應該好忙，弊在佢人緣好朋友多，人情嘅嘢好多時都走唔甩，好似佢同許志安就一向老友鬼鬼，05年曾經喺安仔演唱會表演棟篤笑嘅佢，最近再做串星，幫安仔新歌《芝士》拍MV。

今日安仔就喺ig上載咗一張同子華一齊拍MV嘅相，然後留言話要再次多謝佢偶像幫佢拍MV喎！

其實安仔MV日前已經發過相俾傳媒，仲話今次MV導演係RubberBand主音6號，佢當時話MV故事，係講佢飾演一個保安，喺夜晚遇到《翻生侏羅館》入面，啲蠟像呀、標本呀，一到夜晚就會翻生嘅情節，以搞笑為主。

話明搞笑，梗係要揾個識搞笑嘅人一齊拍，但安仔當時就賣關子唔肯講邊個，今日終於開估係子華。而相片中子華嘅造型同安仔一樣，即係佢喺MV入面同樣做一個保安員喇！

好兄弟有乜計！