最近嘅兩套電影都有唔少好評，分別就係《暴瘋語》同《衝鋒車》，而當中有睇過《衝鋒車》嘅朋友都知，喺片尾會出現咗一個特別鳴謝：黃子華，但係成套戲都冇子華份，咁，好明顯套戲原本係有子華，但最後就刪咗佢嘅戲。

今日《衝鋒車》嘅導演劉浩良就喺微博話：「對我來說《衝鋒車》還未完結！我知道很多朋友關心那段『消失的片段』，因為『某些理由』它無奈地不能跟電影一起面世！我仍在為這段『消失的片段』能重見天日而努力！因為，《衝鋒車》必須補上這場戲才完整！各位，等我！」

喺《衝鋒車》入面，交代香港有大規模曱甴出現，令香港幾近癱瘓，嚴重影響民生，所以任達華個角色隨身都有支殺蟲水。而呢啲曱甴，就係由「張寶強」呢個角色飼養，但戲院上映版本係完全冇「張寶強」呢個人出場講過一句對白，連背影都冇，只係靠用新聞報道手法帶出有呢個人存在。據知，「張寶強」一角，就係由黃子華演出，所以導演所講嘅「消失的片段」，應該就係張寶強嘅戲份喇。

咁點解黃子華呢個「曱甴強」角色會因為「某些理由」無奈地不能跟電影一起面世呢？網民普遍猜想，就係咁嘅，包括話，「曱甴」漫天充斥香港嚴重影響民生，好自然就會令人聯想到另一種會飛嘅害蟲，係喇，你應該估到係乜。而呢一種蟲蟲，又令人聯想到某啲人，係喇，你都應該估到係乜。《衝鋒車》喺內地都有得上演，咁，你懂的。如果刪咗成part「曱甴」，邊個最開心？

導演喺微博講完之後，好多網民都有留言，話支持導演，佢哋話「想看黃子華的政府無能，蟑螂橫行，其實懂你意思的，香港的確蟑螂橫行陰險。」、「等你等你等你努力之後給觀眾帶來好消息！」、「支持，支持。很期待看到子華的表演。」、「我哋就係等子華出場的。」其實想睇子華的話，就要睇導演最後可以搞成點，其實呢各位，呢度都有啲子華嘅劇照睇，可以頂住癮先。

冇錯，原本套戲係有黃子華的。

仲有直指政府無能。