藝人黃子華和佘詩曼昨日現身鄭裕玲（嘟嘟）主持的電台節目宣傳新片《棟篤特工》，但子華因塞車遲到，嘟嘟即在大氣電波隔空窒他：「唉，佢變咗喇，佢以前唔會遲到㗎！」見面時又詐型說：「你唔識早啲出門㗎咩？」子華即無奈拿出手機片段於節目播放，片中他說：「依家好驚險，周圍塞緊車，塞車有咩咁驚險？因為5分鐘後要去嘟嘟嘅節目，上一次我遲到，佢黑面咗一個早上，睇怕今次凶多吉少。」逗得嘟嘟大笑。

夾埋推賀歲片
他們又憶述推拍賀歲片的往事，嘟嘟踢爆子華：「三、四年前有人搵我哋拍賀歲片，我哋講完一輪電話後夾埋推咗。」子華說：「嗰次嘟嘟喺電話度同我講『唔得喎子華，我哋呢啲Legend，我就推喇，你諗你！』」嘟嘟說：「咩呀，你都有份講完一大輪嘢後話推嘅！」」談到《棟》片，子華直言花最多時間在劇本，又搞笑多謝客串的朋友：「其實唔係好朋友，有啲唔係好熟㗎咋，但佢哋好捱義氣。」更表示農曆新年會謝票，雖然他自謙說：「希望有得謝（票）啦！」但據知《棟》片預售場已爆滿，正準備加場，看來今次子華有望一洗「票房毒藥」之名！

佘詩曼與黃子華現身嘟嘟主持的電台節目宣傳新片。