藝人黃子華和佘詩曼今日到電台現身嘟嘟（鄭裕玲）主持的電台節目，宣傳二人主演的新電影。惟節目開始時黃子華因塞車而遲到，嘟嘟即在大氣電波中隔空窒子華：「唉，佢變咗喇，佢以前唔會遲到㗎！」隨後子華一出現即解釋是因塞車，嘟嘟詐型說：「你唔識早啲出門㗎咩？」子華無奈即拿出剛才在車上錄的錄音在節目中播放：「我依家好驚險，周圍都塞緊車，塞車有咩咁驚險呢？因為我5分鐘之後要去嘟嘟嘅節目，上一次我遲到佢黑面咗一個早上，睇怕今次都凶多吉少。」逗得嘟嘟大笑，嘉賓佘詩曼笑嘟嘟大方：「嘟嘟都唔記得，佢頭先話你冇遲過呀。」嘟嘟則為對方解釋：「上次佢情有可原嘅，係架車畀人偷咗。」

一齊推賀歲片
二人在電台節目中又憶起當年一齊拍賀歲片的往事。子華說：「自己咁多年都無拍過賀歲片，覺得拍得賀歲片係身份嘅象徵，唔似得你呀嘟嘟，有冇連續十年冇拍賀歲片。」嘟嘟就踢爆子華：「咁又冇十年，其實不嬲都有人搵你拍賀歲片係你推咗咋嘛。其實我哋呢平時就好少通電話，三四年前有人搵我哋兩個拍賀歲片，但嗰次我哋就講咗一輪電話，最後夾埋推咗。」子華話：「嗰次嘟嘟喺電話度同我講，佢話『唔得喔子華，我哋呢啲legend，我就推了，你諗喇！』」嘟嘟話：「咩呀，你都有睇晒啲分場、劇本呀嗰啲，你講完大堆嘢之後自己都話推嘅！」

事後接受訪問時，問子華是否被嘟嘟窒，子華說：「吓，嗰啲都叫窒？我哋交往係咁㗎喎，嗰啲係chemistry，所有由我開始到農夫呀我哋同鄭裕玲嘅交往都係咁，呢啲就係有好朋友做。（大家會互相窒來窒去？）唔係，係佢窒落來，然後你好開心咁食咗佢！」

約咗嘟嘟遲到真係好大件事㗎！

黃子華驚到即刻拍片解釋。

去到電台就播畀嘟姐睇。

好彩嘟姐都冇嬲，睇佢個樣笑晒就知啦。