如果要揀女神陳法拉定嘟姐鄭裕玲，相信高登仔一定二話不說揀女神。雖然黃子華未必係高登仔，但佢嘅選擇同高登仔都好接近，選擇同法拉合作搞舞台劇都唔返大台再同嘟姐合作拍《男親女愛》。

據知今年子華會全力搞舞台劇，同時仲搞緊個電影劇本，所以呢一、兩年內都唔會幫大台拍《男》劇。而且有一個好重要嘅原因，就係要重組番當年嘅班底，單係嘟姐劇中嘅屋企人，好似原子鏸、鄧健泓都未必搵得齊，更加唔好講搵得番其他演員，例如演雜誌社老闆嘅楚原導演、演子華女友李麗珍同狂追嘟姐嘅李子雄等等。

當然做人都要公平啲，就算子華有期，嘟姐都未必肯接，因為佢都講過唔想再捱更抵夜拍劇。