男神黃子華同陳法拉合演嘅舞台劇《前度》將於7.1開騷，連開24場，連日積極綵排。但昨日有周刊卻爆料，子華對演出要求好高，成日黑面扯火，同鬧爆法拉，二人休息時都係冇交流，各有各黑面。

《蘋果》向兩位當事人求證，法拉未覆，子華就透過經理人回覆三個字：「唔回應。」不過之後又笑笑口補充：「知唔知乜嘢叫排戲？排戲梗係要做戲入面嘅嘢。」

《蘋果》收到風，其實今次係子華打電話到美國搵法拉返嚟幫手，而唔係法拉向子華自薦，而且兩人亦曾合作拍電影《神秘寶藏》，所以就有今次嘅合作。

至於報道所講排戲時子華好激動咁話法拉，事實上呢場戲喺講子華同法拉呢對舊情侶係度爭辯緊，相嗌唔好口，自然就會黑口黑面，或者咁講本周刊覺得佢哋做得好入戲，曲線讚緊佢哋都未定。