黃子華噚日證實嚟緊7月舉行嘅棟篤笑《金盆「浪」口》係佢嘅「最後一篤」，早前同子華神合演賀歲片嘅佘詩曼被問到點睇對方呢個決定時話：「作為觀眾的我，當然係會好唔捨得，同有十萬個為甚麼？但係作為朋友的我，會支持佢經過深思熟慮嘅決定。歌都有得唱啦，變幻才是永恆吖嘛，何況子華自己都話唔係退休。我哋一齊期待7月嘅來臨，一齊嗌回水啦！」

至於近日獲子華神開金口featuring新歌《子華說》嘅古巨基就話：「作為朋友，好尊重佢嘅決定，當然作為好喜歡睇佢棟篤笑嘅觀眾，我梗係唔捨得呢個係最後一次棟篤笑！」基仔仲相信子華神會繼續為香港人發聲：「不過正如子華所講佢唔係退休，佢可能將來仍然仲有好多唔同方法，去為香港人講出大家嘅心聲，學佢喺官網嘅自拍片度話齋，佢會喺《金盆「浪」口》棟篤笑裏面同大家交待成件事，不如我哋一齊期待去佢個騷度聽佢講。」

阿佘話變幻才是永恆，所以好期待子華神7月個騷。

基仔話自己作為觀眾，會好唔捨得子華神最後呢個騷。