黃子華眾多棟篤笑名句中，「一兜Pair X He Lee！」是一句充滿自省的語言，正是這種「You don’t belong here！」的無情，結果為娛樂版逼出了一顆棟篤笑巨星。經過了棟篤笑、電影、電視、出碟，走了一圈，子華回到了起點，下一站目的地將是下月公演的舞台劇《男磨坊》，他說：「咁多年冇做舞台劇，依家做番好冒險，可能一炮玩完，但我希望做行出第一步嗰個，我想畀觀眾睇多啲唔同嘅嘢。如果大家因為我呢次嘅演出，覺得舞台劇原來係咁好睇，令佢哋多一個娛樂渠道，咁樣會令我有好大滿足感。今次呢個劇本難能可貴，探討友情、人性、藝術嘅意義同價值，雅俗共賞，我試過喺倫敦，使咗成千銀都唔知睇咗啲乜？純粹係一啲舞台效果，加一啲無聊劇情嘅垃圾，但《男磨坊》唔同，入面有劇情、有精煉對白，我哋仲將佢本地化左，有咁好嘅劇本喺眼前，我就要做到最好，去令觀眾Enjoy。」

作品比想像中好
一如十八年前子華以「棟篤笑」之名，間接提升了這片彈丸之地的藝術層次，他一炮而紅後，自然有樣學樣者眾，而那些層次只停留於睇熱鬧的觀眾，自然貪新忘舊，猶幸有「哲學底」的子華在這段患得患失的日子况，並未氣餒，對藝術創作有新的體會，他說：「我認為呢個世界有兩種Show Business，一種係觀眾鍾意乜就做乜，但其實佢哋可以做得更好；另一種係做出冲啲更好嘅嘢畀觀眾，連觀眾都唔知呢樣嘢原來可以咁好！我一路做，一路體會，發現原來仲有第三種，就係如果畀心機，係可以做出比自己能力更好嘅嘢，呢種就係藝術創作，作為創作人，我會問自己有冇作品係自覺好掂嘅？喺棟篤笑况面，我有！而我亦好希望第三種嘅情況繼續發生喺自己身上。」

嚴選有質素工作
或者有人會以為因為近年有太多人做棟篤笑，子華才轉戰舞台，由單人匹馬轉為團隊合作，但他絕不同意：「棟篤笑都可以睇成係一場個人表演嘅舞台劇，做舞台劇係我多年夢想，今次劇本非常精煉、精彩，同棟篤笑嘅對白一樣要求高。我認為呢個咁高質素嘅劇本有得做，不過香港有好多好難突破嘅既定諗法，所以英皇肯投資《男磨坊》，都需要一定程度嘅勇氣。我喺呢行幾乎乜都做勻，現時嘅演藝目標，就係想喺現有嘅嘢度再做好啲。近年我開始覺得有時其實唔使做好多嘢，甚至唔使做啲乜嘢，只揀啲有質素嘅嘢嚟做，當你樣樣都接嚟做，以為『又過一次骨』，其實你嘅人生又少咗一啲時間，所以有一個咁難能可貴嘅角色喺度，我就悉力以赴，去Enjoy嗰樣嘢，That’s all we have！」

點睇自己？
早年做過臨記、DJ、資料搜集、PA、話劇團員和編劇的子華，如何評價自己演藝生涯成熟期的表現？

棟篤笑
如果要我講一個我特別鍾意的棟篤笑演出，我講唔到，因為個個都嘔心瀝血，戰戰兢兢咁上台！有D甚至超越左自己，連我都唔知當時點可以諗到出嚟？就好似神來之筆咁！

電影
電影最投入嘅一次係《呆佬拜壽》，近年《阿孖有難》都比較有印象，其餘都好模糊，可以話係為觀眾炒左一大堆乾炒牛河，炒到連自己都唔記得幾時幾月炒咗啲乜！

電視
我喺能力範圍內做咗啲另類嘢，《男親女愛》我由優皮變草根；《奸人堅》係一次顛覆嘅嘗試；最鍾意《棟篤神探》，喜劇人物竟然會死，觀眾反對？令我覺得成件事好有趣。

音樂
我只係視唱歌為興趣，只不過因為「黃子華」有人識，所以有人搵我出碟，呢個世界一向名氣掛帥，如果我唔係「黃子華」，想搞《男磨坊》？或者搞得成，喺個200人嘅場搞兩場囉！

子華透露現階段想將每件工作做到最好，Enjoy過程便可。

子華視做舞台劇為夢想，現終可夢想成真。

子華自覺作品中有過人之處，令他引以為傲。