男神黃子華同大家經歷1997年「秋前算賑」、講過2003年沙士、靚抽過2008年嘅金融海嘯、2014年選擇企喺「雞蛋」嗰邊講雨傘，喺香港所有大事上，佢嘅棟篤笑未曾離開過大家，或許大家總愛喺佢個騷上叫「除褲、回水」，其實有唔少fans係真心愛呢位「男神」，能夠幽默咁帶出港人生活嘅無奈，至少在社會上，夠膽講出社會嘅不公。

子華早前上咗蕭若元嘅節目，罕有講自己嘢，佢都好有興趣做多一次楝篤笑，但唔會喺呢一、兩年嘅事，因為佢做唔到：「我喺香港過咗咁多年，我係地道香港仔，依家由我認識嘅香港發展到今日香港，我點能夠說一個香港故事，或一個我自己嘅故事，而同大家楝篤笑多一次。其實好多嘢笑唔出，唔知點笑，大勢係悲觀，人類從來都係悲觀嘅，作為一個香港人，我希望嚟緊一個騷，去總括一下自己。」表明呢兩年都會暫時「封咪」，佢想釐清香港未來點走，因為棟篤笑要摸得好準，自己先可以去講一個故事，子華亦多謝大家咁多年畀佢嘅滿足感，得到一啲香港人嘅「友誼」，容許佢講笑話。

前港大《學苑》副總編輯陳雅明今日喺facebook留言表示今日最sad嘅事係今年冇黃子華棟篤笑，讚子華以幽默伴隨香港人走過灰色低谷，寫道：「然而，今天連子華都講：『我諗好多野已經笑唔出。唔知點笑。』03年，黃子華還可以笑著對香港人搞gag：『各位，董特首，已經唔存在喇！』沒想到，只不過十三年，香港已經沉淪到子華神也笑不出的地步。誰都不能再自欺欺人，說這個社會一切如常。」

有網民就稱：「連黃子華都唔夠689好笑。」亦有網民表示：「生活已經荒謬過世上所有嘅笑話。」不過更多網民支持子華向電影及舞台劇發展：「可能佢覺得戲劇才有思想出路，永遠尋求突破，好欣賞！」