男神黃子華下個月開最後一次個人棟篤笑，前晚佢現身銅鑼灣，去咗趙崇基執導嘅電影《中英街1號》首映。子華話：「我第一套戲就係拍趙崇基，呢段時間閉關，唔應該見人，但冇辦法一定要出嚟，人生第一個導演。而且今次套片好吸引，香港好少人拍呢類題材。」

揀劇本要求多
問子華於下月舉行嘅棟篤笑，會唔會有敏感題材？佢笑住話成個騷都係敏感題材，包括意識同內容，所以18歲以下唔可以入場。佢又話已經開始排練，會一邊排一邊度橋。
講到有報道話棟篤笑主辦商畀咗一億酬金佢，所以佢可以做埋就「收山」，子華話：「我從來冇話過收山，首先主辦商冇畀咁多錢我，其次我收咪唔係收山。」佢仲話：「如果有劇本搵我都考慮接拍，社運題材都係睇劇本同角色，人大咗要求多咗，要好多方面配合。好似趙崇基呢套以咁平價錢拍出嚟，唔容易。之前見佢搞咗好耐，以為佢拍唔成，依家就拍咗出嚟。」
另外，張達明就喺前日另一個活動話有子華飛，不過因為子華加場，搞到佢唔係睇尾場：「我睇嗰場已經唔係尾場，真係火都嚟。」

黃子華自言已為下月棟篤笑排練，同時努力減磅。