許志安同樂隊Dear Jane今日喺商台接受訪問，講到老婆鄭秀文（Sammi）感冒未癒、聲音沙啞，仍堅持開演唱會，安仔直言覺得心痛，問到Sammi第一晚個唱後，返到屋企係咪好唔開心？安仔話：「首先，佢係住酒店，唔喺屋企瞓。」有冇去酒店陪Sammi？安仔稱：「有去睇吓佢，佢清楚知道把聲失咗就要去面對，佢處理得好好，歌迷都好錫佢。」

問安仔點畀正能量Sammi？佢就話：「揸住bon bon棒係咁扑。」咁幾時整個「許勝不許敗」（子華前晚喺Sammi個唱叫佢哋生小朋友個名叫許勝不許敗）？安仔忍笑稱：「咁囉……好鬼搞笑！」

提到子華又指安仔同Sammi係香港嘅童話，安仔諗咗一諗先話：「唔好啦！」被記者追問唔好咩呀？安仔未有正面回答：「許勝不許敗，我怕入幼稚園有問題，如果罰抄，永遠都係留堂嗰個。」子華又指佢同Sammi唱歌時距離16呎，安仔笑住話：「好搞笑，唱歌唔使咁近。」

提到Sammi噚晚把聲好番少少？安仔就話：「漸入佳境。」不過安仔透露未必會場場睇，因為有一日要為電影宣傳，唔喺香港。尾場會唔會上台做嘉賓？安仔直言：「冇諗過，我唔係嘉賓之一。」

講起前日子華叫Sammi同安仔生個B，叫「許勝不許敗」。

安仔未有正面回答：「許勝不許敗，我怕入幼稚園有問題，如果罰抄，永遠都係留堂嗰個。」