藝人黃子華將會喺7月舉行棟篤笑，因為一個騷名《金盆浪口》引嚟網上極大回響，大家都好擔心子華神要封咪，結果佢琴日出活動嘅時候畀咗一個好傷心嘅答案大家，就係呢個棟篤笑真係佢嘅最後一個棟篤笑，完咗之後就會收咪！當時子華就叫大家唔使擔心，佢話自己唔係死咗，佢會繼續有其他新動向。

情繫香港唔搞巡演
活動完咗之後，子華就喺社交網上拍片澄清番自己嘅講法，等知道呢個消息嘅人更加清楚明白。佢就話其實《金盆浪口》唔係一個騷名，而係佢嘅一個階段：「原本我哋打算宣布呢個係黃子華最後嘅棟篤笑，但我嘅團隊覺得咁樣太決斷，呢啲名太過凌厲會畀人鬧死，所以就用番我好多年前諗嘅一個名，係好多人認為嗰種『金盆浪口』。原則上呢個係我最後一個棟篤笑。」之後佢又澄清呢個騷係唔會有巡迴演出，因為成個主題係「101%」圍繞香港，如果去到其他地方都係講香港話題係太唔負責任。有唔少網民都話失望但都會繼續支持佢，亦有人留言話：「講得原則上，即係可能有例外喇！」咁又唔使擔心嘅，子華同大家講得相信佢已經諗好之後嘅路，大家就繼續撐佢喇！

基仔支持老友決定
而好友古巨基（基仔）亦喺社交網發文支持子華，基仔表示：「金盤（盆）浪口。作為朋友，當然尊重你的決定；作為喜歡看你棟篤笑的觀眾，我真心不捨這個是最後一次。這些年來的棟篤笑裡），謝謝你用各種金句化成大家生活中的止痛劑！『神救贖人世／靠笑穴』『將苦水飲到喜悅／子華說』…『愛，講是沒有用的』對，7月，入紅館撐！」

黃子華話「原則上」呢個係最後一個騷。

係咪驚講得太實冇彎轉呢？

拍片澄清，講清楚都係好事嚟嘅！

古巨基Facebook