黃子華、陳法拉首次合作演出之舞台劇《前度》完場，喺劇中嘅演員喺第三幕開始入戲，包括之前未warm up嘅法拉都好投入，同子華默契都好好。法拉獨腳戲好長，社會對社工唔公平嘅批判同唔理解，社會人士同官員只流於表面嘅關心，成段獨腳戲法拉感情紓發都好出色，眼淚話流就流，明顯比之前兩幕演出有改善。

至於子華喺第三幕有一場戲質疑法拉唔承認相愛，場戲佢要發好大脾氣，仲推晒啲嘢落地，子華排練冇白費，演技非常出色，全場觀眾俾佢震懾，屏息靜氣咁睇兩人演出。

下半場嘅第三、四幕仍然都唔少對白爆粗，連啱啱進修完嘅法拉都唔例外，佢有幕講到以前教band 5學生時，就扮啲學生講：「教乜X嘢書呀鬼婆，幫我打飛機啦。」

而成個舞台劇嘅故事就係十年前20歲嘅陳法拉，因為一次返工，喺黃子華同前妻嘅咖啡店做咗一個鐘頭嘢，之後因為子華同前妻囡囡出事，所以留低咗法拉一個喺鋪頭等佢哋兩公婆返嚟，之後就融入咗佢哋嘅家庭，之後子華就同法拉發生咗6年嘅不倫之戀。直到法拉寫畀子華嘅情信畀佢前妻發現，法拉就一走了之，而子華就留喺度。

過咗一段時間，子華太太患上絕症，子華就同埋老婆同仔搬走咗，但之後子華就性情大變，子華個仔就去咗搵法拉，當見面後，子華就同法拉重修舊好。

之後佢哋兩個開始回望過去，又一路傾將來，子華以為苦盡甘來，一路發現兩個嘅想法有好多唔同，好似階級觀念、對唔同事情嘅睇法，子華同法拉一直不停爭吵，但又好愛對方，最後都分手收場。

喺第三幕完咗之後，有觀眾以為全劇完，仲拍晒手，不過其實仲有第四幕，就係子華囝囝出場，帶咗個英式早餐嚟同法拉一齊食，最後以輕鬆形式完結。