男神黃子華與陳法拉以舞台劇《前度》再度回歸，每逢開騷必定一票難求的他，今次合共演24場，而門票今日上晝十點正式公開發售，首日每人每次只能買六張飛，其中尖沙咀通利琴行門外便一早大排長龍，過百人等候開門。

呻限買六張門票不當
排頭位、不願上鏡的A先生與兩位女友人，就自爆凌晨12點已到達霸位，更指自己射波冇返工；至於排「上游位置」的Betty，就表示自己是陳法拉粉絲，希望子華再開棟篤笑的她就大呻每人每次限購六張門票做法不對：「大部份門票都做內部認購，我哋排隊做咩？應該每人十張！」自爆與朋友抽輸「生死籌」而前來排隊的她，就透露清晨六點已到場，首選680元門票，而談到子華不開棟篤笑，她謂：「子華都講咗香港已變成冇咁好笑，大家都明點解架喇！」

排靠後位置的黃小姐，就坦言喜歡子華多年，八點幾到場的她就指自己網上認購失敗：「都怕依家買唔到！買唔到都冇計，買得幾多得幾多！」又指希望子華再做棟篤笑，不過舞台劇都一樣支持。

子華神嘅吸引力。

今次合共演24場。