黃子華「收咪」喇……感覺同世界末日一樣，嚟緊7月嘅「金盆浪口」棟篤笑會喺最後一次。咁多年嚟，有無數金句彈出，下面呢啲有冇中咗你嘅Best of the Best？

「搵食啫，犯法呀？」
「我覺得講得出『我好鍾意返工』呢句說話既人，一定係鬼上身。」
「化妝就係你落咗妝，我仲認得你，你落咗妝，我唔認得你，嗰啲叫做喬裝。」
「依家香港人生仔可以冇老婆，但唔可以冇菲傭。」
「乜嘢叫做天真？就係你相信一個藝人嘅形象就係嗰個藝人，咁樣就叫做天真。」
「一層500呎嘅樓就要500萬，已經係豪宅，閣下只需要擁有一層500呎嘅樓就係富豪…遲吓做唔到500呎樓嘅富豪，就要做300呎嘅富豪，再遲啲要做100呎嘅富豪！」
「人類有人類自己嘅食物鏈，人類嘅食物鏈簡單好多，只有三種。最下層係無產，中層係中產，頂層係ｘ家產！」
「上帝創造處女，男人創造婦女。」
「年輕人冇嘢叻，最叻質疑上一代，否定一切，我唔係老竇，係腦殘……似喪屍唔諗嘢，淨係識搵錢搵錢。」
「各位，你明唔明白，我哋今時今日嘅香港係處於咩狀態？我哋買串魚蛋都咁㗎嘞！做咩呀？做咩大家買串魚蛋（一樣）咁多錢，佢串魚蛋多我兩粒㗎？我唔要你比番兩粒我，我要你攞走佢果兩粒！大家少兩粒，咁就公平呀！做乜佢有甜醬我冇呀？我唔要你比甜醬我，我要你舔走佢果啲甜醬！大家都唔甜，咁就公平呀！做咩佢又無咗甜醬，又無咗兩粒，佢仲食得咁開心呀？唔公平！咁點先公平呀？大家都唔開心囉！大家食得好仆街咁囉！」

喺度要講句sorry，因為廿幾年嚟子華句句都係金句，未能盡錄，不如大家喺下面接龍啦。