楝篤才子黃子華日前接受才子蕭若元主持嘅網台節目《蕭遙遊》訪問，黃子華話近年好少睇電視，就算睇都只係揀選收睇網台節目，特別係《蕭遙遊》，又認為蕭若元係非常唔離地嘅知識份子，子華同時喺節目中透露，由於依家摸唔清自小認識嘅香港，亦笑唔出，所以呢兩年都唔會再做楝篤笑，將來亦可能只會再做多一次，有機會成為「絕響」。

節目中蕭若元追問子華有關楝篤嘅構思，同滿唔滿意自己嘅成就，子華話：「我冇乜遺憾，我江郎才盡咗好多年，但江郎才盡得嚟，我仲好有興趣做多一次楝篤笑，但你放心，唔會係呢一、兩年嘅事，因為我都做唔到，我想釐清一樣嘢，我喺香港過咗咁多年，我係地道香港仔，依家由我認識嘅香港發展到今日香港，我點能夠說一個香港故事，或一個我自己嘅故事，而同大家楝篤笑多一次。其實好多嘢笑唔出，唔知點笑，大勢係悲觀，人類從來都係悲觀嘅，作為一個香港人，我希望嚟緊一個騷，去總括一下自己。」

至於，幾時先再做楝篤笑，子華話：「其實睇下我幾等錢使，其實睇我如果能夠把握到呢個題材，依家時勢其實講乜都有人鬧你，讚唔讚你都唔重要，香港好慘地方係藝壇有周潤發，而政壇係冇周潤發、冇劉德華嘅人物，依家有一個思潮係大家乜都唔要，唔要黃子華扮嘢，我唔會話呢樣嘢啱定錯，但係香港未來點走呢？我要摸得好準去講一個故事，度電影可以同人哋一齊度，但係度楝篤笑係好個人嘅嘢，幽默感係好個人嘅。咁多年嘅滿足感，得到某些香港人嘅友誼，容許你講笑話，唔係人人行上台都可以講笑話，尤其是亞洲人、中國人，好多時係階級嘢，大佬講笑話唔好笑（照拍手），話蕭生好嘢﹗中國人唔易接受人哋講笑話，所以我有呢個任務，如果大家接受，我點都要講多次。我最近7月會做一個舞台劇，楝篤笑我呢一、兩年都未曾把握到。」

對於係唔係確實只演最後一次，子華說：「我唔夠膽講，我起碼會做多一次。」