劇集《棟篤神探》首周收視勢如破竹，黃子華前晚火速擺慶功宴，更揚言如收視高達四十點，拍檔蔡少芬便會以三點式示眾！

近來無綫劇集收視麻麻，終靠《棟篤神探》打破悶局，首周收視高開31點，氣勢如虹！子華前晚豪擲等同「兩個騷」的酬金，與蔡少芬（Ada）、姚嘉妮及姚子羚等演員在酒店大快朵頤，兼現場收看《棟》劇祝捷，可惜監製徐正康因病未能出席。子華笑說：「希望每升一點就食一餐！今次我打頭陣，之後交晒畀Ada！」

自資百萬出碟
子華更屈得就屈，答應如果收視達40點，Ada將瞓身答謝街坊：「咁嘅時勢，收視去到4字頭已經好劃時代，到時Ada會着三點式示眾！」子華更笑言無懼如朱茵般蝕錢，自資近七位數字成立新樂隊「哈痞」：「預冲（蝕錢）啦！出碟只求『哈痞』（Happy），希望十年後歌神退出時，我會接棒開個唱祝福大家！」至於被屈的Ada亦「以屈還屈」回禮：「我着三點式，佢咪唔着囉！佢仲要結婚生仔添呀！（人哋話你演繹得好似鄭裕玲？）似嘟姐就抵到爛啦！影后喎！不過我唔係抄，可能兩個角色都係女強人，加上套劇係《男親女愛》班底，大家先入為主！」

黃子華與蔡少芬雖然戲况戲外都互窒，實質老友鬼鬼！