正在籌備5月紅館演唱會和全新廣東專輯的古巨基，新專輯概念是香港故事。這個概念早在去年年初已構思，古巨基更為此定下了很多歌曲題目，其中一首歌名鎖定為《子華說》。古巨基表示︰「子華喺棟篤笑裏面嘅金句，好係香港人喺生活中嘅心聲。例如愛情、上班族、生活日常等，無論乜嘢年紀聽到，都可以從中搵到共鳴位，令你會心微笑。我同子華講咗呢個歌曲概念，我話呢個世界冇第二個人可以幫我達成呢個project，所以我真係非常非常感謝子華呢次拔刀相助。」

問到子華神為何如此撐古巨基，子華笑說︰「我好少幫人結婚時做兄弟，人生都係做過兩次，第一次係劉青雲，另一次就係十幾年後幫基仔。好少人請咁大年紀嘅人做兄弟嘅，今次係為咗報答佢，哈哈。」他續說：「其實呢次聽咗基仔講想做隻碟關於香港故事，覺得幾有意思。加上首歌又有林夕阿Mark（雷頌德）咁強陣容，多謝基仔呢啲大歌星選中我啫。」新歌由基仔唱，子華Rap，還有林夕填詞，將子華歷年金句整合。對於歌曲，古巨基就話：「大家都投放咗好多心血，先得出呢首《子華說》，創作過程好玩好豐富。」

問到古巨基對子華哪些金句最深刻？他謂：「最深印象係人生三大矛盾：『搵食啫、犯法呀？我想㗎？！』仲有『落咗妝仲認得嘅叫化妝，落咗妝唔認得嘅叫喬裝。』好多句都好啜核抵死。」子華更在錄音期間靈感大爆發，鬼馬地即興創作金句，「船到橋頭變林夕」，「做隻貓、做隻狗、做隻出位的馬仔」，為《子華說》添上神來之筆。錄完這首歌，古巨基除了要感謝子華的出「口」相助，還感謝對方多年來為香港人帶來這麼多歡樂。「香港真係好需要一個黃子華，帶畀大家歡樂去減壓，而呢首歌正好記錄咗子華嘅部分心血。」。