鄭秀文（Sammi）前晚舉行第二場演唱會，雖然聲線仍然沙啞走音，但她似已戰勝心魔，抹乾淚水，以正面態度演出。當嘉賓黃子華出場大講棟篤笑時，Sammi更笑到踎低！

鄭秀文（Sammi）前晚的失聲及走音情況較首場更為嚴重，整晚要不停飲水潤喉；但唱了一個多小時，豁了出去的Sammi聲音反而愈唱愈開；在第二場演唱會，Sammi已換了三套新衫。

前晚嘉賓黃子華現身時贏得全場掌聲，他甫出場即重提Sammi曾表示想畀錢退票一事說，「我作為一個把聲成日出問題又病嘅表演者，我對你有個好大的忠告，無論幾唔舒服都一定『唔好回水』！」令全場爆笑。子華隨後清唱了當年許志安任Sammi嘉賓時唱的《其實你心裏有沒有我》，還向Sammi愈唱愈埋，他笑言：「安仔最錯係，我同Sammi唔熟就扮熟，佢同Sammi好熟但就扮唔熟！點解？唱呢首歌好應愈唱愈埋，但安仔當年就由頭到尾都企喺度，我用把尺喺片段中度過，佢同鄭秀文嘅平均距離係15呎！」Sammi聞言笑到彎晒腰。

子華又指Sammi太瘦，問她「點生BB？」Sammi即反駁：「邊個話要生？」子華卻抵死謂已為她們的BB諗好名，「就叫『勝不許敗』，一家三口一齊就贏晒，許志安、鄭秀文、許勝不許敗！」贏得全場掌聲！Sammi的第三場個唱昨晚8時39分開騷，經針灸治療的Sammi，聲線與第二場的表現差不多。昨日下午，Sammi在網上放了一張晒腹肌的相，認真Fit。

子華唱歌時與Sammi愈行愈埋。

黃子華妙語如珠，令Sammi笑到踎低。