棟篤男神黃子華近日才開心宣佈將於今年7月舉行「18禁」棟篤笑「金盆浪口」，話口未完，他前晚卻公佈完騷後「收咪」，令粉絲心碎。子華昨凌晨再拍片放Facebook，強調這次棟篤笑後真的會「金盆浪口」，今次是他最後的棟篤笑，更不打算有巡迴，因為內容101%香港本土題目。

現年57歲的黃子華是港人歡樂泉源，28年間先後舉行過14次棟篤笑，被封「棟篤男神」，他陪着港人成長，見證回歸、沙士及佔中等歷史時刻，觀眾當然期待子華會繼續與大家一直共同度過。子華近日才宣佈將在7月再踩入紅館舉行棟篤笑「金盆浪口」，坊間旋即掀起撲飛潮，可是前晚子華在土瓜灣出席活動時，竟親口宣佈7月的棟篤笑是最後一個，他說：「我又唔係死，又唔係退休。我唔係『封咪』，只係『收咪』，亦唔係退休，只係唔做。」

收咪有迹可尋
子華宣佈完騷後「收咪」，其實早有迹可尋，他年前講過香港已經沒甚麼好笑，早於03年，子華曾諗過最後一個棟篤笑要叫「金盆浪口」，想不到這天終要來臨。熟悉子華神信徒，心中有數，他這個決定計劃不是衝動，但不熟悉的人，總以為他突然宣告「收咪」是宣傳伎倆。為免大家有疑惑，子華前晚活動後再在Facebook專頁上載一條兩分鐘片段，他簡潔標明：「唔好意思，不厭其煩，最緊要清楚。」
子華再三強調：「我想再澄清一次，今次騷名叫『金盆浪口』，佢唔係一個騷名，佢係一個真正階段，小弟真係『金盆浪口』，原本我哋想宣佈呢個係黃子華最後一個棟篤笑，但我個團隊認為咁太決斷。我甚至諗過個騷似Michael Jackson（米高積遜）咁叫《This Is It》，直情畀人鬧死，咁太過凌厲，我用番呢個好多年前諗嘅名『金盆浪口』，冇錯，就好多人認為嘅『金盆浪口』，小弟原則上最後一個棟篤笑。」
除澄清「金盆浪口」外，子華亦強調今次並不會有巡迴：「好多人仲問緊幾時巡迴，我再解釋多一次，呢個騷唔會巡迴，唔係因為佢係最後一個騷，而係主題主要講香港。我以前去第二度做騷，好多人問會唔會講吓我哋馬來西亞、三藩巿、美國或廣西，好多時我真係會擺一啲當地材料入去，但呢一次101%香港本土題目。如去第二度巡迴係對大家不負責任，唔會巡迴。」

唔啱小朋友睇
子華的「金盆浪口」將於下月公開發售門票，暫定12場，是否加場則會視乎反應。這次開騷將會18禁，即不歡迎18歲以下人士入場。子華前晚說：「十八歲以下人士真係唔適合睇棟篤笑，因為啲話題唔啱細路仔聽，但有啲媽咪帶埋小朋友嚟聽，令我有啲尷尬，因為棟篤笑應該係冇乜限制，但係我保證，有啲棟篤笑嘅話題係唔適合小朋友睇。譬如講性、講人情、講職業，小朋友係絕對唔適合聽，只有大人先會明。今次嘅話題，係好香港性嘅，唔係香港人唔會咁易明。」

子華前晚出席車行活動，並宣佈今次棟篤笑後將「金盆浪口」。

子華昨日凌晨拍片上載FB，強調今次是他最後一個棟篤笑，亦不會有巡迴。

子華的棟篤笑一直深受港人歡迎，近年的場次皆一票難求。