黃子華將在暑假於紅館舉行棟篤笑，早前已宣布這是他的最後一個talk show，而子華開騷被譽為天價，有人粗略估計他這次大半個月已穩袋一億，真的可以「收山」歎世界，不過子華強調只是「收咪」而已！

黃子華前晚出席好友趙崇基執導的電影《中英街1號》首映禮，他笑說︰「我拍最初幾套電影，都幾乎係趙崇基做導演，佢搵我就無乜利嘅，今次無我就應該大收。」子華最近為棟篤笑做準備，不諱言本來閉關不出來見人，但趙崇基是他人生中第一個合作的電影導演，加上對方親自邀請，所以一定要支持。

被問到其棟篤笑可會涉及敏感題材，子華笑說︰「我嘅騷次次都敏感喎，今次更加唔准18歲以下人士進場。」有指他今次開騷賺夠一億打算「收山」？他聞言後笑說︰「我諗都唔夠膽咁諗，主辦商都無話我有呢個價，同埋我只係收咪啫，可能趙崇基會搵我拍戲呢。」子華又稱不抗拒拍敏感題材的電影，認為最重要是有好劇本又好玩。

黃子華早前暴瘦完要再增磅，他笑言之前太貪吃，現在向「余樂天」邁進。