由英皇娛樂集團主辦的劇壇經典《男磨坊》，將於9月3日至7日假香港演藝學院舉行，有傳男主角黃子華倣效「大衛像」拍海報時裸露下身，但他已否認並澄清只用「假身」拍攝！

早前黃子華與《男磨坊》的監製和導演，構思拍攝宣傳海報，由於劇本講述三個大男人為一幅現代派名畫，展開人性及藝術的爭議，他們認為宣傳海報應包含藝術和幽默成分，最後決定以「大衛像」表達藝術效果。

有傳子華為今次海報而拍攝裸照，當大家見到子華倣效「大衛像」裸露時，大感嘩然，更有指海報太敏感及過激，不宜放在交通繁忙及人流太多的地方，亦不宜放在公眾地方及報章雜誌，故工作人員惟有漏夜趕工，重新改動海報設計。

批評尺度保守
對於被指裸露下身拍攝海報，子華強烈否認：「其實果個係假身，點會傳到我裸露拍攝？我只係影上半身相片，再喺下身加工畫上大衛像，明明係石像，只係帶出藝術訊息，我睇過張海報，唔認為係裸露，反而覺得OK，後來佢地仲加左隻貓擋住，更加冇嘢睇啦！我冇諗過咁多人睇咗咁大反應，又話我露上身、露下體。」他亦不禁批評香港尺度保守：「點解平日啲雜誌又可以放藝人性感艷照做封面呢？」

至於英皇發言人馮貽柏則說：「冇諗過大家咁關注原稿張海報，子華冇露下身，佢化身『大衛像』係演繹藝術形態，冇可能影張海報露下身，大家唔好亂傳，佢當日只係赤裸上身幾小時，以全白化妝拍攝，再經美術設計處理，營造『黃子華大衛石像』海報。」由於設計圖惹起關注，惟有「剪走」子華宣傳海報內的下身，另一些海報則用貓隻遮擋其重要部位。

黃子華的大衛像造型海報，用貓貓遮掩重要部位，意念大膽創新！