古巨基忙緊籌備五月紅館演唱會，仲有全新廣東專輯，新專輯概念係香港故事，呢個概念早喺上年初已構思，最近推出嘅其中一首新歌《子華說》，基仔唱，子華Rap。基仔話︰「子華喺棟篤笑裡面嘅金句，好係香港人喺生活中嘅心聲，無論乜嘢年紀聽到，都可以搵到共鳴位。我同子華講咗呢個歌曲概念，我話呢個世界冇第二個人可以幫我達成呢個project，好感謝子華呢次拔刀相助。」

子華神解釋點解會撐基仔，佢笑話︰「我好少幫人結婚時做兄弟，人生都係做過兩次，第一次係劉青雲，另一次就係基仔，好少人請咁大年紀嘅人做兄弟嘅，今次係為咗報答佢！其實呢次聽咗基仔講想做隻碟關於香港故事，覺得幾有意思。」

講到子華邊啲金句最深刻，基仔話最深印象係人生三大矛盾「搵食啫、犯法呀？我想㗎?」，仲有「落咗妝仲認得嘅叫化妝，落咗妝唔認得嘅叫喬裝。」好多句都好啜核抵死。更鬼馬嘅係，子華喺錄音期間，突然靈感大爆發，即興創作金句，包容有「船到橋頭變林夕」，「做隻貓、做隻狗、做隻出位的馬仔」。

錄完歌，基仔除咗感謝子華出「口」相助，感謝佢多年嚟為香港人帶嚟歡樂：「香港真係好需要一個黃子華，帶畀大家歡樂去減壓，而呢首歌正好記錄咗子華嘅部分心血。」

古巨基話呢首歌記錄咗子華嘅金句！

基仔話香港真係好需要一個黃子華！