黃子華和鄭中基（Ronald）兩個看似風馬牛不相及，一個編劇出身，最成功是做棟篤笑，一個唱歌出身卻成了喜劇演員。
世事無絕對，近年醉心攝影和拍電影的鄭中基，再一次走入導演的崗位拍新片《神秘寶藏》，他沒有捧自己，而是找黃子華來主演傳奇人物張保仔，Ronald自言很喜歡張保仔這個角色，但他自知自己演不來，相反黃子華就一定得，究竟點得？黃子華都話：「有人搵我做，咁咪有趣囉！」自信與自知，其實睇你自己點睇！
鄭中基同黃子華都有一個共通點，就是兩人都試過自編自導自演，結果同樣碰壁。07年鄭中基首次執導電影《心想事成》，票房和口碑都麻麻，事隔七年為何再做導演？Ronald話：「其實第一部戲唔係我想拍，本來想拍嘅唔係咁樣，當時因為有投資者縮沙，呢個係好大教訓。」所以他要再執導電影，更加要審慎考慮，他說：「點解等咁耐，係因為想真係做到先，好似今次拍張保仔嘅題材，如果我哋 Handle唔到場海戰，就唔會拍。」
Ronald經過多番的資料搜集，連浪都好講究，「因為機動船同帆船嘅浪係好唔同，睇人哋拍海戰戲，架船行得快，都可能同現實不符，有咗第一次嘅教訓，今次差不多籌備咗兩、三年先埋位開工。」今次Ronald拍住經驗豐富的導演陳嘉上聯合執導，兩人如何分工？他謂：「我就喺前面拍，而陳嘉上就喺後面睇，唔會阻演員去發揮，睇吓我玩到咩程度，見有唔妥佢會Reject，所以佢好重要，好似守尾門咁。」
至於黃子華02年曾經自編自導自演電影《一蚊雞保鑣》，沒想到錄得慘淡票房，不敢說不會再做導演，但慘痛的教訓，子華猶記心中，他說：「我拍《一蚊雞保鑣》時，係冇理自己嗰部分，只係理演員，而且有好多鏡頭，我自問兩邊兼顧唔到，我好佩服Ronald，佢仲要係超級攝影發燒友，佢係會買器材來試。」
自認對拍攝有點八卦的Ronald，經常拍戲收工後也不願離開，他說：「我都幾唔要面留喺現場度搞搞震，有時上網搵機器訂返嚟試，荷李活嗰啲就貴，我咪搵土炮嘢，呢部戲開拍前，我就入長洲拍吉鏡拍咗一日，每十分鐘拍一張相，段片雖然好短，但用平器材都一樣得。」
台山 Johnny Depp
今次《神》片是一個穿越古今的奪寶傳奇，故事圍繞清末時代的海盜張保仔，鄭中基坦言很喜歡張保仔這角色，他說：「我唔想做衰張保仔，好似叫我去做殺手，行出嚟都畀人笑，我知自己未必做得到，但子華就一定得，佢嘅戲好實在，要有說服力。」
有段時間沒拍戲的黃子華，去年除了拍《失戀急讓》外，也接拍了這部《神》片，他謂是機緣巧合，「當時我準備緊棟篤笑，都幾突然，但係做張保仔喎！張保仔洞我就去過，嘩！做張保仔？第一，張保仔三個字已經興奮；第二，覺得冇人會搵我去做張保仔，有人搵我去做，咁就有趣啦，估你唔到！」
在黃子華眼中張保仔更是神級代表人物，他說：「香港地真係唔係好多個Legend，可能張保仔之後就只有李小龍，張保仔在海盜史上係有排名，但原來搵資料先發現，張保仔個老婆鄭一嫂，即係陳法拉演嘅角色，係女海盜排名No 1，原來出名過張保仔，咁強大嘅人物同船隊，對我來講係好吸引。」
至於子華版的張保仔會有何特色？子華親自解說：「首先我要練台山話，因為張保仔係台山人，但係真正嘅台山話係冇人聽得明，咁我就發明咗自己一套嘅台山話，明唔明就各安天命啦。」演海盜怕不怕被拿來跟Johnny Depp（尊尼特普）比較，他抵死的說：「我梗係做得好過佢啦，不過唔同嘅，佢正常，我癲啲。」
有幾癲？如何定位？子華說：「演員就要搵到一個位，我個造型仲要吊眉，感覺兇狠得嚟但又好笑，始終呢部係笑片，而呢個海盜是個開心人，不求一切，只求開心，所以成個人都好亢奮，連個妝都幫到手，我第一日化完個妝，行過都冇人認到我，我哋成班好似深山野人咁，好黐線但又好快樂。（是不是你的性格？）呢個係好理想嘅性格，某程度上只係放大咗。」
法拉 好忘我
首次跟陳法拉合作，子華形容她是個忘我的演員，他說：「法拉係我古代嘅老婆，我哋係一對好暴力嘅夫妻，佢好打得，係真係打得，劇組有訓練，佢係第一個話要去，結果第一日訓練佢就練到扭親頸，有次佢練鞭，我企喺度睇風景，都畀佢鞭到，佢真係投入到好忘我，第一次同佢合作，好難得對手咁投入。」陳法拉打得，黃子華就打到濕身，Ronald踢爆說：「因為子華有好多動作戲，日日打到成身濕晒濕到透，件衫都未乾過，濕到露點，分分鐘要喺佢心口打格。」
Ronald說起子華拍動作場面的趣事，戲中另一位女角台灣女生許維恩，就踢爆和Ronald拍爆破戲分時就驚到手震，她說：「有一場戲我們後面的船景會被炸毀，他問我OK嗎？我說沒問題，但他的手拖住我時是一直抖震。」Ronald解釋因為那場戲安裝了三十多個炸藥，事實上是很危險的。
Ronald更坦言戲內的張保仔，不單止說一個俠盜劫富濟貧的故事，而是說每個人心中都有一個寶藏，「每個人心中都有一個寶藏，有人係金銀珠寶，戲入面當我返去古代時，原來我嘅寶藏係陳法拉，而子華戲入面嘅寶藏就係尋寶過程。」
現實中Ronald心中的寶藏是甚麼呢？一臉幸福的他說：「依家梗係我屋企人，尤其我兩個寶貝仔女。」至於子華依然故我的說：「我仲搵緊，其實生命本身就是寶藏。」
許維恩（中）表示很高興與子華及Ronald合作。