黃子華繼09年拍住視后佘詩曼演《絕代商驕》叫好叫座，埋單收視平均33點，四年後再拍新劇《My盛Lady》，有傳TVB為救亡提前推出，連聲稱罷睇TVB的網友，可能有部份為捧他而放棄熄機，證明「福將」威力不減。不過這個「福將」，日前卻向本報爆料，這劇將會是幫TVB拍的最後一套劇，只因他拍厭喜劇，想跟一貫棟篤笑一樣講政治主題，子華無奈說：「如果2017無普選，想拍政治題材睇嚟好困難。」子華迷想再睇他演劇集，真係跪地都未必有機會啦！

子華今次再度出山拍劇，他聲稱因戲癮大發，要拍套來止癮，他更親身度橋相當緊張，但就否認欽點徐子珊做女主角，「我邊度有咁嘅權呀！啲女主角個個都咁忙，佢哋邊個有期咪拍囉！（咁老拍檔Benz雄（許紹雄）呢？）佢係我大佬，佢話做我先敢做咋！」

子華迷苦等四年先見到他大作，問他下次要再等幾耐，子華竟然話：「拍完呢套止咗癮啦！我都唔知，可能呢套會係TVB最後一套，因為如果拍我唔想再拍喜劇，反而想拍啲劇情片，想拍政治題材，好似好多年前有套電影叫做《黑金》咁，但係如果二○一七年冇普選，要拍呢啲題材睇嚟都好難，所以真係唔知下套會係幾時。」

愛上拍小電影
子華雖然唔拍劇，但有傳他將會夥拍老拍檔Do姐鄭裕玲主持一個八、九十後創業真人騷節目，但原來已被他推掉，因他更愛拍小電影，「我都想同Do姐合作，亦都有興趣做主持，但係個期唔得我就推咗，我有自己嘢要忙。（忙搞咩？）我呢排好鍾意拍小電影呀！（小電影？即係微電影？）係！但我鍾意叫小電影，好似上次《旋風腿》咁，好好玩！（上次搵咗劉青雲同黎耀祥，今次搵邊個客串？）嘩！呢啲人情債唔可以欠咁多㗎！（搵左麟右李囉！反正佢哋搵咗你做顧問？）唔好啦！我怕羞㗎！」

子華在《My盛Lady》中飾演戀愛專家，但現實生活中被指因跟拍拖九年的化妝師女友溫安妮（Annie）兩年前分手，情傷而抑鬱暴瘦，這天見子華體重明顯回升，他更賴被靚衫所累，「係因為嗰時個騷啲衫太窄，我都唔知Keep得幾辛苦，其實我胸肌腹肌乜肌都有。（有冇人魚線先？）梗係有，鯇魚線都有呀！不過依家肥番冇晒啫！（感情生活點呢？）我對現狀好滿意，多謝關心。」

※子華在劇中艷福不淺，跟「索腿」陳敏之有一段情。

※子華否認欽點對手，但他在劇中的「Super Senior」其餘三子許紹雄、林子善和阮兆祥，以往都有合作開。

※子華跟首度合作的徐子珊，由冤家而變成情侶。

※子華坦言對喜劇題材已經拍厭，希望轉拍政治劇情劇。

※四年前子華拍阿佘的《絕代商驕》，收視亦有33點，難怪無綫要搵他回巢救亡。

※子華早前愛上拍「小電影」，更搵來老友劉青雲客串《旋風腿》。