不哭了！鄭秀文（Sammi）前晚舉行的第二場演唱會，雖然病況未瘉，但心態轉變，以正面態度與病魔抗衡的Sammi真的沒有再哭，還笑到彎腰，全因有黃子華這位表演嘉賓。子華竟將自己的鬼才放在Sammi和許志安身上，直指她們這對金童玉女已成為社會意義和責任，又催促二人盡快生B「許勝不許敗！」

鄭秀文前晚的聲沙、失聲及走音情況較首場演唱會更為嚴重，不管唱快歌或慢歌，都要不停飲水潤喉，但唱了個多小時後，豁了出去的她，反而愈唱愈開聲。是晚Sammi又換了三套新歌衫，內內外外都傾盡全力兌現其六字真言「有幾多畀幾多」觀眾。

教Sammi「一定唔好回水」
前晚的表演嘉賓黃子華現身時，贏得全場掌聲雷動。子華抵死地重提Sammi曾想退錢畀觀眾一事：「Sammi陰公咯！但我作為一個把聲成日出問題又病嘅表演者，我對你有個好大的忠告，就是作為專業表演者，無論幾唔舒服都一定唔好『回水』！事關會影響好多人，呢樣你真係要學我，有人嗌都唔使理佢，嗌嘅人好幼稚！」

當大家還未笑完，子華已轉話題表示：「唔好睇我咁奔放，其實係上台以來最驚的一次，因為我其實唔認識鄭秀文，只見過佢一日，合作過一部戲，戲中做佢老公，雖然離咗婚，但戲中講過乜都唔記得，又有幾熟呢！不過就記得你同我講早晨，我問你食咗飯未？你又問我有無睇過19世紀俄國大文豪陀思妥耶夫斯基嘅《罪與罰》？話有啲唔明，然後我就唔想睬你，因為我無睇過，我哋對話就咁終止，關係亦就咁結束。」

聽到Sammi笑到走晒音，子華即叫她小心把聲，但隨即又繼續「發功」說：「年幾之後，就話鄭秀文請我做嘉賓，我上網睇，做鄭秀文嘉賓嘅個個都同佢有關係.……但點知睇到一個衰過我，比我搵到人墊底。2009年，鄭秀文演唱會出現咗個嘉賓同佢唱咗一首歌，我都識唱，但唔使音樂，因為無音樂我就最有音樂感，大家仲要睇住我點樣唱……」他說罷即清唱了《其實你心里有沒有我》。聽到全場指當年唱的人是許志安，子華又謂：「你話係咪離譜？安仔最錯係，我同Sammi唔熟就扮熟，佢同Sammi好熟但就扮唔熟！點解？唱呢首歌好應愈唱愈埋，但安仔當年就由頭到尾都企女响度，我用過尺响片段中度過，佢同鄭秀文嘅平均距離係15呎，而佢同葉德嫻合唱的一次，平均距離係8呎，仲唔係扮『生保』？」此時分別在台上台下的Sammi和安仔都笑到彎晒腰。

生仔取名「許勝不許敗」
子華又問觀眾，安仔和Sammi同台時可有親密動作？是否很想安仔跟Sammi講……，台下即叫聲震天，Sammi則走向安仔座位方向、竭盡所能叫安仔不要中計！

豈料子華沒有就此放過Sammi，他謂：「大家係咪好想安仔同Sammi講……你太瘦喇！咁樣點生BB？」Sammi反駁：「邊個話要生？」子華卻抵死地謂：「仲得㗎！你今日有啲攰，休息完會唔會有啲力同安仔……傾吓？我想話畀你知，講少少社會意義，點解大家想你同安仔一齊？因為係童話，係金童玉女，但係又曾經爆過煲，然後破鏡，竟然又能夠重圓！係童話中嘅童話，所以你哋有社會意義、有社會責任，因為今時今日嘅香港，缺少好多童話。所以如果你兩口子响屋企鬧交，如果許志安鬧你，你有權叫安仔收聲！因為係為了香港，叫安仔買豉油都唔好駁嘴，大局為重！而童話最完美係生個仔，我連你個仔個名都幫你諗好，就叫『勝不許敗』，許志安個仔，許勝不許敗！一家三口一齊就贏晒，許志安、鄭秀文、許勝不許敗！」說罷贏得全場掌聲如雷！

另外，Sammi昨日在舉行第三場演唱會前上載一張晒腹肌及一張臉上插滿針的針灸相，並留言「噚晚半夜三點咳到六點，幾乎棚牙都咳埋出嚟！唯有針灸，針針到穴，不過聲線有進步咗！Yeah！重有六場演出。鄭瘦文，即係我，加油！今晚又有全場天使撐住我走畢全程。恩典夠用。」Sammi的第三場紅館騷與前一晚開場時間差不多，都是晚上8時39分，而經過針灸的治療，她的聲音亦與第二場的表現相若。

表演嘉賓黃子華在台上大拋金句，令Sammi與觀眾都捧腹大笑。