正在籌備5月紅館演唱會和全新廣東專輯的古巨基（基仔），新專輯概念是香港故事。這個概念早在去年年初已構思，古Sir更為此定下了很多歌曲題目，其中一首歌名鎖定為《子華說》，而新歌上架一天更即登上音樂平台廣東歌歌曲榜首位！古巨基說︰「子華喺棟篤笑裏面嘅金句，好係香港人喺生活中嘅心聲。例如愛情、上班族、生活日常等，無論乜嘢年紀聽到，都可以從中搵到共鳴位，令你會心微笑。」基仔續說：「我同子華講咗呢個歌曲概念，我話呢個世界冇第二個人可以幫我達成呢個project，所以我真係非常非常感謝子華呢次拔刀相助。」

整合歷年金句
問到子華神為何咁撐基仔，子華笑說︰「我好少幫人結婚時做兄弟，人生都係做過兩次，第一次係劉青雲，另一次就係十幾年後幫基仔，好少人請咁大年紀嘅人做兄弟嘅，今次係為咗報答佢，哈哈。」他續說：「其實呢次聽咗基仔講想做隻碟關於香港故事，覺得幾有意思。加上首歌又有林夕阿Mark咁強陣容，多謝基仔呢啲大歌星選中我啫，哈哈。」新歌中，基仔唱，子華Rap，還有林夕填詞、將子華歷年金句整合，最後再由雷頌德監製、作曲同編曲，這個簡直是黃金陣容。對於歌曲，古巨基就話：「大家都投放咗好多心血，先得出呢首《子華說》，創作過程好玩好豐富。」

難忘啜核金句
問到基仔對子華哪些金句最深刻？古巨基：「最深印象係人生三大矛盾：『搵食啫、犯法呀？我想㗎？！』仲有『落咗妝仲認得嘅叫化妝，落咗妝唔認得嘅叫喬裝。』好多句都好啜核抵死。」更正嘅係，子華在錄音期間突然靈感大爆發，還即興創作金句，「船到橋頭變林夕」等，可謂為《子華說》添上神來之筆。

錄完這首歌，基仔除了要深深感謝子華的出「口」相助，還感謝他多年來為香港人帶來這麼多歡樂。他說：「香港真係好需要一個黃子華，帶畀大家歡樂去減壓，而呢首歌正好記錄咗子華嘅部分心血。」此外，基仔更祝賀子華主演的「棟篤特工」票戶高達四千多萬，打入香港電影票房史上二十大。

正呀！

古巨基指呢個世界除咗黃子華，冇第二個人可以幫佢達成呢個project。

MV中佢哋仲將黃子華歷年金句整合。

古巨基唱、黃子華Rap，真係冇得頂呀！

仲有好多以前黃子華開騷嘅造型添呀！

古巨基（左）、黃子華