迪士尼動畫《優獸大都會》（Zootopia）將於今個復活節上映，請來黃子華及容祖兒配音，祖兒表示今次應承為電影配音，全因自己是「男神」子華的fans，「電影公司問我有冇興趣接呢項工作時，我第一個問題就問『子華係咪接先？』佢哋確定子華應承，我就即接啦！」

祖兒笑說，由細睇子華睇到大，尤其欣賞他的棟篤笑。提到與祖兒首度拍檔，子華亦很開心，「加上呢部動畫以動物做主角，我本身非常鍾意動物，覺得幫動物配音，好玩過人類角色，可以好放好癲。」

子華需要安全感
子華今次聲演為搵兩餐而行蠱惑的狐狸阿力，他笑言角色與他十分相似，「就係睇落好似好勁，其實一啲都唔勁！」他又大讚電影很有深度，角色亦讓他有發揮。祖兒則大讚子華將狐狸演繹得很無賴，他亦笑住邀功：「原本個角色無咁突出㗎，全靠我配音咋！」他又笑說由細到大都希望有一個如動畫中那般打得的兔仔當女友，「我其實好需要安全感，一直都想有個6呎5吋嘅女友，最好高我4個頭，可以孭我出街，就最好啦！」

子華與祖兒首度合作，為動畫配音。