娛樂圈俾人叫男神的，如恒河沙數，但講真稱得上「真‧男神」的，只得一個——黃子華。日前子華放風話「大勢係悲觀」，所以要暫別搞棟篤笑一兩年，轉為同法拉陳做舞台劇《前度》，緊接再同老拍檔阿佘（佘詩曼）合作電影《棟篤特工》。工作排山倒海，但子華依然分到身拍廣告。

邊鬼個咁大個人，仲落雨踩水氹呀，仲細咩？！咪住，望真啲，係黃子華呀，男神一身《楝篤神探》嘅莫探員打扮，搞邊科呢？

原來莫探員，唔係，係黃子華至啱，襯住同陳法拉嘅舞台劇《前度》未埋位採排，走咗去還廣告債。

呢日下午，我地見到子華同班工作人員企晒係筲箕灣東大街橋底圍埋一齊聽導演講解，之後男神就企埋一邊等工作人員set機位，大大話話等咗半個鐘先埋位。

導演一聲action，人造雨徐徐落下，黃子華就自動波入戲。有片有真相，只係一take，就已經收貨。班工作人員仲把握機會拉住男神逐批影合照，真係睇到壹仔好葡萄囉！