前一日先講緊黃子華同陳法拉主演的舞台劇《前度》加場，但加場又如何？這些機會……唉。日前大會宣布舞台劇由原定18場加到24場，一班預售撲空的粉絲即刻擔定櫈仔排通宵等售票處開門，排頭位的朋友更自爆係「射波」嚟買飛，排10個鐘只為見男神一面。雖然今次加開6場，不過門票兩個鐘已經賣晒喇，都唔知仲有冇下次喇。

話過短期內都唔再搞棟篤笑的黃子華，7月將會同陳法拉於演藝學院演舞台劇《前度》，死忠們當然又仆倒去捧場啦！舞台劇原定公演18場，但子華神的號召力實在太勁，預售門票光速秒殺，所以大會就加開7月22至28日共6場，希望滿足到一班早前「食白果」的粉絲。今次每人每次限買6張，尖沙咀通利琴行9點已經有過百人排隊，排頭位的A先生就向傳媒透露不想上鏡，點解？因為A先生為了撲飛，由凌晨12點等到朝早10點，連工都冇返呀，咁神心抵你買到嘅！而演藝學院同樣出現人龍，導演兼影評人舒琪於網上貼上演藝外的排隊相，留言：「APA（香港演藝學院）從未見過這樣的長龍！」
至於售票網站亦大塞車，唔少網友話撳到爛咗幾個F5掣都入唔到網站，齊齊去子華facebook訴苦，子華知道銷情咁好，於傍晚貼上同法拉以及劇中囝囝綵排時的合照，留言：「我和我的前度同我個仔謝謝大家支持。」粉絲亦馬上洗版式嗌「加場」，不過子華經理人就向本報表示唔會加場，相信粉絲又要再失望多次喇！

法拉惡補廣東話
講來講去都係子華神，其實《前度》女主角法拉都好勤力，難得可以同「永遠榮譽男神」同台演出，當然不敢怠慢。返香港不久的法拉在銅鑼灣街頭開facebook Live同粉絲打招呼，透露舞台劇已綵排兩日，暫時一切都好順利，並覺得劇本好好玩。不過，法拉都知自己廣東話講得未夠純正，怕觀眾聽得辛苦，專誠搵老師惡補，她說：「今日第一日去廣東話老師度上堂，因為我差唔多兩年長期喺美國讀書，好少講廣東話，加上本身廣東話都麻麻哋，所以要再練。主要係讀劇本入面角色嘅嘢，想對語言感覺熟悉啲，廣東話，返嚟喇！」法拉咁有Heart，令人更加期待《前度》正式公演呀！

https://www.facebook.com/dayowongoffical

（左起）劉俊謙、陳法拉同黃子華已經密鑼緊鼓地排…

演藝學院門外亦稀有地大排長龍。

24場舞台劇門票全部光速售罄，子華神認真勁！