有「神劇製造機」之稱嘅黃子華又有傑作重播呀，今次輪到2004年嘅劇集《棟篤神探》，一播就即刻喺網民間引起熱議！每次「子華神」一拍劇，就會爆出一大堆膾炙人口嘅金句，《棟》劇亦唔例外，好多金句到今時今日都仲有人記得，而劇中多個經典鏡頭亦令大批網民回味無窮！

經典劇情深入民心
首先有網民熱推蔣志光「打格仔」嘅一幕，呢一幕係講到子華神所飾演嘅莫作棟喺洗手間向「方便」緊嘅史高拔（蔣志光飾）問話，史高拔條褲除到去小腿位置，鏡頭仲突登幫佢嘅重要部位打格仔，引起網民無限幻想！另一幕就係由郭峰飾演嘅神棍喺劇中胸襲由姚子羚飾演嘅Bebe，大批網民係咁用呢一幕改圖，發揮無限創意！

金句逐句數
之後梗係唔可以唔提劇中金句啦，雖然子華神喺《男親女愛》入面已經創造咗好多金句，但係《棟》劇都唔輸蝕，好似「若要人不知，唔好太低B！」、「唔使騰，No problem！」而蔡少芬飾演嘅女主角李慧慧亦唔執輸，金句包括「唔在乎你有冇畀人奸，只在乎你交唔交到單！」、「你瓜我唔瓜大瀑布！」等等。網民又提到《棟》一劇除咗男女主角黃子華同蔡少芬係Perfect match之外，仲話配角都發揮得相當出色，整體嚟講《棟》劇可以話係冇得輸，定必好似《男親女愛》咁，掀起一輪追劇潮！

網民有話兒
由我xxx：仲記得嗰陣有兩個結局，我鍾意bad ending，死咗咪幾淒美，唔知點解要嘈到拍多個結局出嚟囉！黃子華都話過呢套唔係喜劇，因為死好多人，主角喺結局死嘅話先係神來之筆！
波斯xx：呢個時段最啱我呢啲「廢青」獨樂樂，但係如果凌晨播就更加好喇！
心急xx：蔣志光同識時務者（魏駿傑）都好搶戲，好好睇！
摸到xxx：以前幾鍾意蔡少芬，嗰陣同我老豆一齊睇笑到傻咗，次次死人都同蔡少芬有關！
三眼xxx：呢套劇真係好多金句，又勁多好笑場面，又偷拍余慕蓮、又冰皮對酥皮、又「凶險畀女長人」！

子華神劇嘅金句真係深入民心，就算大家呢一刻唔記得，講番出嚟大家都一定聽過！

黃子華每套劇都發揮得好好，被封為「子華神」！

呢一幕廁所戲刻意打格仔，令觀眾們無限幻想！