宣佈暫棄棟篤笑的黃子華，7月將會孖女神陳法拉合作演出舞台劇，之後又將自編自演一套純搞笑港產片《棟篤特工》，仲點名搵舊拍檔佘詩曼做女角，皆因同對方好夾咁話。即將出山見觀眾，「才子華」不容有失，日前戴帽戴口罩包到冚現身銅鑼灣狂掃中外猛片DVD，目測買了近20隻，慢慢煲偷吓師囉！

55歲的「才子華」繼2012年夥拍林嘉欣演出舞台劇《野豬》後，睽違四年，將於7月1日至21日期間，聯同陳法拉合作共18場舞台劇《前度》，劇中子華扮演鰥夫，與「消失無蹤」的舊下屬法拉關係撲朔迷離，令不少粉絲甚為期待！完成舞台劇後，男神將會小休兩個月，9月再孖佘詩曼開拍新戲《棟篤特工》，化身港版Mr.Bean。

日前下午，慣性出街密封的黃子華，穿上至愛乾濕褸現身銅鑼灣，見他在HMV專注揀碟，先睇最新碟及最佳銷量個架，快手揀了幾隻西片《封鎖新聞線》和《火星任務》等，然後再巡美劇，每巡一個架都細看15分鐘，結果足足企咗兩個半鐘，才揀了近20隻DVD，滿載而歸。企到腳仔軟，子華上樓去cafe除口罩歎杯咖啡，歎茶時亦不忘睇書增值自己，一秒都唔好浪費！休息大半小時，子華再包到冚行去利園買BB用品送禮，買了一條卡通口水肩和一盒玩具，然後低頭走人。

戴帽戴口罩的黃子華歎慢版揀DVD，行咗兩個半鐘。

好有耐性烏低身揀碟。

之後去睇BB衫。

黃子華與舞台劇演員及編劇黃詠詩私交甚篤，日前就跟對方B女鬼馬合照。

子華揀條口水肩都揀足半個鐘。

見到小女孩，包到冚嘅子華撩女玩。

黃子華將與陳法拉合演舞台劇。