貴為兩屆影后的葉童，一向要求嚴謹，第一次夥拍棟篤笑匠黃子華，即刻擦出火花，事緣日前有雜誌報道指兩人在新劇《奸人堅》中一拍不合鬧不和，報道指葉童擺出阿姐款，黃子華則明讚暗寸對方演技好。

「改完先話我知」
昨日《奸人堅》眾演員齊集將軍澳電視廣播城進行開鏡拜神儀式，子華與葉童顯得相敬如賓，以行動闢謠。適逢昨日是情人節，監製遂要求子華獻吻給每位女演員，但他只是吻了她們的手背了事，王俊棠見狀即執起一個燒豬頭，強迫子華咀嘴，最後子華惟有尷尬地錫錫豬頭。
子華受訪時否認跟葉童鬧不和，他說：「點會呀！有不和我實攞出嚟講，我唔可以收埋，如果唔係我做唔到戲。」提到葉童拍劇期間多次被傳擺款，子華力撐對方說：「我唔覺係咁，大家合作好好，如果成日請食飯係擺阿姐款，咁就係囉！」至於葉童則謂：「佢（子華）好有創意，真係需要時間去適應，佢咁生鬼，對於我嚟講係一個挑戰。佢會改劇本，第二日同我講，我咪話佢：『你改完劇本先知會我！』我呢一句話，真係嚇咗佢一跳。」

黃子華與葉童因拍劇傳不和，昨日兩人顯得老友鬼鬼闢謠。

監製要求子華向眾女獻吻，後改為錫手背，但觀乎黎萱表情似乎萬般不情願。

眾演員齊切燒豬，祈求拍攝順利，相信兩位是非主角亦心有同感。

楊秀惠昨日穿上超低V到場，非常性感，黃子華更躬身輕吻其玉手，排場十足女王駕到。