鄭秀文前晚紅館騷，男神黃子華做嘉賓，玩棟篤笑。講講下，子華擺安仔上枱。話啲人咁鍾意Sammi同安仔，係因為佢地係一個童話：「金童玉女，但係爆咗煲！曾經。然後破鏡，竟然又能夠重圓。呢個，係童話中嘅童話，所以你明唔明白，你嘅社會意義，你嘅社會責任呀？係因為今時今日嘅香港，係少咗好多童話㗎喇！所以，如果你兩口子喺屋企鬧交，如果許志安鬧你，你係有權同佢講：『收聲！』唔係為咗我，係為咗香港！『我叫你去買豉油就買豉油！唔好駁嘴！大局為重！』

講咗咁耐，子華仍然唔捨得走，問大家，呢個童話點樣可以最完美呢？「真係，生個仔（你懂的，全場又尖叫）我連你個仔個名都幫你諗埋，你個仔就叫做『勝不許敗』！」Sammi即尖聲甜笑，子華當然唔罷休，繼續話：「許志安個仔，許勝不許敗！三母子一齊走出嚟，贏晒！許志安，鄭秀文，許勝不許敗！」全場報以熱烈掌聲。Sammi失聲走音道：「多謝！」